E ya migkamali i'Ibarra. I'Padre Damaso ya ing
makasake ketang magarang karwahi at papunta ya
king bale a ibata'na pamu.
"Nu ko ume kanyan?" nganing fraile kang Maria Clara at kang Tya Isabel a sasampa na king saken dang penagawlan pilak. I'Padre Damaso, busal nitang balisa nang kaysipan, tatampya'neng malale king pisngi ing dalaga.
"Aha, ha! Alben ku pin nung ninung malyari buri, alben tamu. .nganang bubulung e maglalawe at likwa'no ring adwang babaing mengapamulala. Makaduku at malagad a takbang disa'ne ing eran at menik ya.
"Mekad atin yang sidyang sermun at pagmemorya ne," nganing dara. "Manik na ka, Maria, pota mitawli kata."
Nung magsermun ya o ali i'Padre Damaso, ninu man alang makibalu, dapot makabaldugan a bage ing gugulu king kaysipa'na uling e na ne gematan man i' Capitan Tiago at iti naman siniklod ya pamu ba'neng uman a gamat.
"Santiago!" ngana, "atin katang pisabyan maragul a bage. Tara king tanggapan mu."
Meliswas ya i'Capitan Tiago, mengaumun ya dapot memintu ya at tinuki ya king gulut ning maragul a pari at kalub na sera ne ing pasbul.
Kabang mipapagsalita lang lihim, pakibalwan ta naman nung ninanu ya i'Fray Sibyla.
Ing matenakan a dominico ala yu king kumbintu. Maranun yang tinipa, kaybat nang migmisa, at minta ya king kumbintu ra ding kalupa nang dominicano ketang
bukana ning Puerto de Isabel II o Magallanes,
