kulan at ngeni mu rin sukat kung muli king balon.
Bukas daun at dapat no mang ganakan detang mete na.”
Linawe neng e bubulad Maria Clara karetang maragul at makapaninap nang mata, menagtal yang sampaga at kaybat nganang melunus kaya:
"Sulung na, a ra na ka yantala. Kalabas ning mapilan aldo mikit katang pasibayu. Ibili mo rening bulaklak babo rang aun ding pengari mu!” Tinipa ne kanita i’Ibarra, tikya’neng Capitan Tiago at i’Tya Isabel kabang i'Maria Clara migkulung neman king silid a pipangadyan.
“Pakisabi mu namu kang Anding mg isadya ne sana ing bale uling muli la karin i’Maria Clara at i’Tya Isabel. Mayap a paglakad,” nganang Capitan Tiago kang Ibarra kabang sasampa ya king saken a pepaynturu king plasa San Gabriel.
Kaybat, bilang pamatula kang Maria Clara a disa 'nang manangis siping ning Virgen, ngana:
"E ka kikyak, anak! Maya'pa salangi kang kandila kareng maminting balang metung. Itulid me kang San Roque ing metung at ing kadwa kang San Ratael, ing patrun da ring maglakad. Sindyan mya naman ing sulu ning Nuestra Senora de la Paz y Buenviaje uling dakal a tulisan ngeni. Mayap na ing gumugul maminting a kandila at manentimus a laru kesa king manatbus kang maragul a alaga.
