Karin, ketang matas nang baidbaid ning bunduk, lele ning kakaluskus a batis, makasalikut ya ing metung a kubu karetang misasalapung dang sanga at lalam da ring makapal dang bulling ding mangaragul a tanaman. Babo ning bubunga'nang ilib ning kubu, kukulate ya ing tanaman a kulubasa, mitmung bunga at bulaklak. Iting nialating dampa maki panagawla yang sagung usa, bungu ra ding babing dikut at ding mapilan kareti maki makaba lang patsit. Kaniti sapni lang tagalug ding manuknangan. Mabibye la king pa mangasu at pamanyibak dutung.
Lalam nang lilung ning metung a dutung, ing ing kung gagawa yang palis-timbu, kabang ing metung a dalaga lulula'no ring ebun, kalamunding at gule king metung a salikap. Adwa lang anak, babai at lalaki, ding mamyalungan lele ning kataung makalukluk king miragsang pun dutung. Ing lalaki maputla ya, payat. matamle. Detang mangabilug nang mata, malalam la paglalawe. Kaniting mengayayat nang panaske niting lalaki, akilala ta ya, ya ing anak nang Sisa, i'Basilio, ing kapatad nang Crispin.
"Potang kumayap ya ing bitis mung maki sugat," ngana ning anak a babai, "myalung katang salikut at aku ing mamuntukan.”
"Tuki kang manik kekami ketang tungatung ning bunduk,” ngana naman ning anak a lalaki, "at karin minum kang dayang usa a maki sabo dalayap ba’kang taba at kanita ituru rakang maglundag karetang batu babo ning batis.”
Tiniman ya i'Basilio, linawe ne ing sugata'nang bitis at saka ne telangan ing aldo mapali aslag. "Pisali mo rening palis,” nganing ingkung king
