lawe bista man ing demonyus a sagwan at maki iki
ume rong kinisan ding mataram nang ipan itang butit
nang balamu butit dalaga.
I'Capitan Tiago kapilan man e ne lepitan ing santung iti uli ning takut nang pota magmilagru ya. E wari ding aliwang santus agyang deta mung e binang masanting a pangagawa karin Paete, madaias ing kikimut la’t gagalo anti mong taung mabye ba’rong gulwan at parusan ding makasalanan? Karin España, pikabalwan king ing metung nang larawan Cristo ngening gagawan deng saksi king pangaku nang lugud, tatangu ya arap ning ukum, at ing metung na pang larawan Cristo mu naman begut ne ing wana’nang takde makapaku at kinawl ne i’Santa Lutgarda. Subali kanyan e ne wari abasa pamu ing aklat a bayu pa mung mibulalag dikil king sermun a depata’nang kikimut mu at kukumpas ning larawa'nang Santo Domingo karin Soriano? Tutu pin sa ing santu e ya sinabi kataya man dapot king kimut na buri nang ipayntindi d pepayntindi ning maki gawa king aklat, king ipamalita na ing kawakasa'ning yatu. E na wari sasabyan mu naman king ing metung nang pisngi ning Virgen de Luta karin Lipa mayalbag ya kesa king metung at ing gilid na lalam ning bestidu na purus yang burak? E na buring sabyan masala niti king ding banal a santu maglakad la naman at e ro tatas ding bistidu ra at sasakit la naman a ipan at lalbag a pisngi uli na mekad ning pamikasala tamo? E ra pa wari ikit ding adwa nang mata nung makananu yang kikimut at duruku i'Cristo neng mag-Siete Palabra la reng pari at iti ya ing makapatangis at makapanagulele karing anggang babaing tau banwa a maki malambut a puso? Kamasalan pa? Itamu kabud ikit tamu nung makananung ing manaral papakit ne karing sabla ing panyung maki-daya potang kukuldas de king krus at maybug ta nang manangis mu naman kaniti dapot king kealan tang kalma pigtapat ning sakristan king ita biru mu at itang daya daya namu ning metung a manuk a pete na, inasadu at pengan itang oras a ita bista man Viernes Santo, at ing munisilyus mataba neman. Inya i’Capitan Tiago, bista man tau yang maingat at relihyoso e ya lalapit king talibung nang San Miguel. Kaylangan ing dumayu at mayap na ing makasiguru, ngana king sarili na. Balu kung arcangel ya, dapot e ku tiwala, ay! ali ku, e ku tiwala!
