"Pakirandaman yu, ginu, ing tangkang inisip ku," nganang minyabing misipisip Elias kabang papunta la San Gabriel. "Ngeni isalikut da kayu king bale ning metung kung kakaluguran karin Mandaluyung. Idala ko ngan kekayu ring kekong salaping asagip ku at kitkut king pu'ning metung a dutung a baliti, king malihim a kutkutan ning kekong apu. Lakwan ye iting balen.”
“Ban munta king aliwang labwad?” nganang sinalabat Ibarra.
“Ban pagkabyayan yong tahimik ding aldo makatagan king kekong bye. Atin kong kakaluguran Espanya, masalapi kayu, malyari ra kong dinan indulto o kapatawaran. King sablang bage ing aliwang labwad para kekatamu metung yang balen a mayap pa kesa king tune beitan.”
I'Crisostomo é ya mekibat; misipisip ya't é bubulad.
Ketang penandit miraras no king ilug Pasig at ing bangka migmula neng linaban king agus. King tete Espanya papulai ya ing metung a makakabayu at merandam ya ing makaba at masikan a silbatu.
"Elias,” nganang Ibarra, "ing kekong keyalan kalma pepasari na ning kanakung sapni. . Mekatadwa yu segipan ing kanakung bye, at utang ku kekayu e mu ing pasalamat nune pa ing pangabayara’ning kekong pibandyan. Usukan yu kung magkabyayan king aliwang labwad, uli niti tuki ko kaku at magkabyayan tamung anti mong mikapatad. Keti ala kayu namang kalma.
“E malyari! Tutu king aku é ku malyaring malsinta ni tumula king kakung balen, dapot malyari kung paipagkasakit at mate king sepupuna’na, at mekad
