yang Gobernador. Nung ali sana linisa’neng mayap ing
balen anti mong bandeha!"
“At matampung la sanang lubus deng salasalungat!”
“E ra sasabyan king dakal pa ing mikakalating gabun a ala pang tao? Ba’t e ro yugse karin deng dakal a indyung mayangin at magbibyasa? O nung aku ing Kapitan Heneral balu na ing tungkul na,” ngana ning putut a takde. “Agpang king balita ku mwa yang tutu uling dakal ya sinaup kanyang Ibarrang yan.”
“Dakal ya kasi depat a mayap !” nganing payat kabang samal yang mamepe. “Ikit yu na ing kealan dang pasalamat ding indyo? Tau la reng makanyan? Hesus!"
“At balu yu nung nanu ing abalitan ko?” ngana naman ning metung a sundalus.
“Lon ta na! Nanu ita? Nanung sasabyan da?”
“Ding taung sukat paniwalan,” ngana ning sundalus busal pamagtahimik da, “bibitasan dang itang balabalitang mitalakad yang pipagaralan metung mung sangkan.”
“Hesus, ikit yu na? ngarang agad meniwala king dimdam dang balita.
“Kanwari mo pipagaralan ya ing buri nang italakad dapot ing tutu bisa yang gawang matibe nang pagkambilan potang luban mi la’t dakpan!”
“Hesus, karok a paksa! Ing indyu ya mung makaukul anti kanitang dwag a kapagnasan!” nganing mataba. “Ay! nung aku mu ing Kapitan Heneral, manakitan la . . . wa! manakitan la . . .!”
“Aku man makanyan ku pamalak!” ngana king putut a takde ning payat. “Iparakap ko ngan deng abugadilyu, deng magpari-pari, deng mangalakal, at ala na pang dalum-dalum, at saka ko patabi o paugse! Ing marawak kaylangan putputan ibat king yamut!”
“Sasabyan da king yang salasalungat a yan anak ya kanung kastila . . . ,” nganang minyabing é maglalawe ning putut.
“Inya paid !” nganang sinyo ning mataba. “Agyang kapilan karen yang kalahi! Ninung indyu ing makibalu king rebolusyun? Manese kang awak . . . manese kang awak . . .”‘¹’
1 "Manese kang awak at tuktuka’na ka mata,” ngarra ning metung a kasebyan.
