"Mesugat ya ing alperes?” nganang kinutang bandang tawling Linares, “Ah!...”
At ngeni meyakit ing é na pa ayakmul ing kanan king kayang asbuk.
“Padre kura, 'meko keni! Ala nang dapat pitakutan!” nganang migsundung gugulisak ning alperes.
Ing Padre Salvi, maputla, mepilit ya mu ring linwal king kayang pigsalikutan at tinipa ya king eran.
“Ding tulisan pete re ing alperes! Maria, Sinang, lungub ko king kwartu, itrangka yeng mayap ing pasbul! Kyrie eleysonl”
I'Ibarra migbanda ya naman king eran bistaman i’Darang Isabel ngana kaya :
“E ka pa migkumpisal, é ka lulwal!”
Itang mayap a matwa meging kakalugura'ne ning mangubye kayang indu.
I’lbarra tinipa ya mu rin. King makapaligid kaya balamu ing sabla tutulug, balamu e la makagpa king gabun ding kayang bitis. Sisyuk la ring kayang balugbug, ding kayang bitis mabayat la at magkasakit king panakbang. Mamalun a daya, sala, at dalumdum ing mililiwas daralan king kayang panlalawe.
Bistaman ing bulan makaslag yang misnang kasala king banwa, itang baintau mangatakid ya karing batu at dutung king dalan a kanita alang tau at malungkut king pamagdilidili.
Malapit king kwartel menakit yang sundalus a pakasadya bayoneta, mainge mipagsalita, at uli nita milabas yang é ra apansing.
King tribunal makarandam lang barug, gulisak, saingsing, panagkas. Ing siwala ning alperes mararandam busal ning inge at magbabo king sabla.
"King pango! Iposas yo gamat! Barilan ya makatadwa ing kimut! Sarhento, mibili kong gwardya. Ngeni alang maglakad, agyang pang ing Dyos! Kapitan, alang matudtud!
I'lbarra selusu na ing lakad papunta keta karela. Ding kayang utusan balisa reng panayan.
"Igayak ye ing mayap diling kabayu at matudtud na kayu!” nganang minyabi.
Linub ya king kayang gabinete, sidwan a nung nu ya magobra at mamalagwa neng sidya ing metung a
