King sidwan pipanganan mamapun ya i'Kapitan Tiago, i’Linares ampon i'Darang Isabel. Ibat king sala mararandam ing kalaksing ding pinggan at kubyertus. Sinabi nang Maria Clara ing e ya maybug mangan at minta ya king pyanu kayabe ning masayang Sinang a sisitsit kaya karing myaliwang bage malihim, kabang ing Padre Salvi lakadlakad yang balisa karing mingatba nang panig ning sala.
Ing paymawi e ya mengan, e uli ning e ya danupan, nune panaya’ne ing metung a tau at sasamantalana’na ing panaun a ing kayang(1) Argos e ya sa makarungut: ing oras nang mapun Linares.
“Lon mu sana nung makananung ing pantasmang ita manatili ya keting anggang kawalu ning bengi,” nganang bubulung Sinang at tiru ne ing kura. "Ngening kawalu ning bengi dapat yang datang. Yang metung naman malsinta ya kang Linares.”
I'Maria Clara linawe neng makatingangas ing kayang kakaluguran. Iti naman e na pansing ita at sindu na ing makatakut nang labit.
“Ah, balu ku na nung baket e ya mamako agya mang pamarandaman ke: e bisang migugul para sulu king kumbintu! Balu mo? Ibat ketang mesakit ka, ding adwang sulung sadya nang sisindya, e no misasalangyan . . . Dapot, Ion me nung nanu ya mata at nung nanu ya itsura lupa!”
Keta mu ring penandit ing relo ketang bale tinigtig yang kawalu. Ing kura mengaligkig ya at linukluk king metung a suluk. ___________ 1 Prinsipe king mitologla a biirang mapagumasid tiling dakal ya mata. Pepatudtud neng Jupiter at saka ne pete. Karing mata nang Argos penagawla’neng Jupiter ing iki ning paboreal.
