Kabang iti malilyari, ing metung a lalaki pupulai yang papunta king bale nang Don Crisostomo at menik yang mirarapal.
"Atyu ing ginung makibale?” nganang kinutang ning siwala nang Elias king metung a utusan.
“Atyu king kayang gabinete at magobra ya.”
I’lbarra, ban ilimbang na ing kayang inip manenaya king oras ban makapakipagkasalese kang Maria Clara dikil karing malilyari, migbili ya ban magobra king kayang laboratory©.
“Ah, ikayo, Elias?” nganang minyabing masikan. "Isipan da kayu. Napun akalingwan keng kitang kekayu nung nanu ya lagyu itang espanyol a nung kenu bale menuknangan ya ing kekong apu.”
"Ing bage pintalan ku keti, ginu, e dikil kanaku . . .”
“Alben yu,” nganang tinuglung Ibarra, e na apansing ing kabalisa’nang Elias at linele ne ing metung a trosung dutung king api. "Mekatuklas kung metung a bage maulaga: iting dutung e ya mitau king api . .
“Ginu, ing pamunta ku keti ngeni e dikil king dutung; dikil king binang kaylangan a tipunan yo ding sabla yung papil at tumakas kong malagwa.”
I’lbarra linawe neng mipamulala i’Elias at, inyang akit na ing beyata’ning makalarawan king kayang lupa atabilya’ne ing bage tatalna’na karing kayang gamat.
“Dulukan yu ing sablang malyaring makapanganyaya kekayu at kilub ning metung a oras dapat na kong atyu king metung a karinan a alang panganib.”
"At, baket?” nganang kinutang Ibarra.
"Ibili yu king panatag ing sablang bage mal kekayu . . .”
“At, baket?”
“Silaban yu ing sablang sinulat yu o ing misulat para kekayu; ing lalung alang kabaldugan malyaring papangabaldugan deng e mayap . . .”
“Dapot, baket?”
“Baket? Atuklasan ke ngeni pamu ing metung a pamagtangkang pamanyalake a ibintang da kekayu ba’kong mipanganyaya.”
“Metung a pamisapakat? Ninung makipasari?”
