Ing pisasabyan mabayat. Balu nang Linares ing panugali nang Donya Victorina at balu na naman ing dapta'na pin ing sasabya'na. Pakisabyan yang makirandam king katuliran anti mong pekisabyan ya dikil king dangalan at mayap a panugali ing metung a karabinero o pulis ning Aduana potang burya’na ing manakit kontrabando ketang nung nu ala iti. Alang kabaldugan ing makisabing mayap; ing lalangan ya, lalu pang marok; ala nang aliwang sukat daptan mine ing makilaban.
"Dapot, makananu?” nganang lalakad, sasabmg dili na. Nung palayasa’na ku? Nung yang atupan ku ing asawa ning alperes? Ninung mabisang maging tegawan ku keting pamilaban? Ing kura? Ing kapitan Tiago? Taksil neng da itang oras a nung kapilan mekirandam ku karing kayang usok ! Mapaglinlang 1 Dapot, ninung minilit kakung magpakilala kung mayap, manyabing kapalalwan, mangayang e tutu! Nanu ing sabya'na kaku ning dalagang ita? Ngeni sisisyan ku ing meging sekretaryu da ku ring sablang ministro!"
Makanyan yang migunamgunam ing kalulung Linares inyang datang ya ing Padre Salvi. King kamatutwanan ing pransiskano maygit yang payat at maputla king sadya, dapot ding mata na kikislap la king é karaniwan a tindag at karing kayang labi sisiro ya ing makabaldugan a timan.
"Ginung Linares, magdilidili kayo?” nganang memuge papunta king sidwan a makabusni pasbul at nung nu la manibatan mararandam ding tigtiga’ning pyanu.
I'Linares bisa yang tumiman.
"At i'Don Santiago?” nganang tinuglung ning kura.
I’Kapitan Tiago dinatang ya king penandit mu ring ita, inuma ne gamat ing kura, kinwa ne kupya at bastun, at titiman yang mipnung yumu. "Tara, tara!” nganang sasabi ning kurang linub king sidwan, tutukya’nang Linares at i’Kapitan Tiago. “Atin kung mayap a balitang pabalu karing sabla. Tinanggap kung sulat a ibat Menila a patune king dela na kaku napun ning Ginung Ibarra . . . uli niti, Don Santiago, ing sabagkal milako na.”
