I'lbarra diku ne ing buntuk na anti mong migugunam, kaybat minatna ya at nganang mekibat:
"Iting pisasabyan, kakaluguran, mangaylangan masusing pamagaral. Nung king kakung pamanaliksik akit ku king detang kadalungan magdala lang katuliran, sumulat ku karing kakaluguran ku Madrid, pablasang ala tamung diputadu. Kabang makanyan, panwalan yu king ing kapamahalan kaylanga’ne ing metung a tapuk a maragul a sikanan at kapalyaryan ba’reng igalang ampon ba'nang apapamintu ing upaya na.”
"Ita, ginu, potang ing Kapamahalan makipamuk ya king balen; dapot king ikakayap ning Kapamahalan, é tamu dapat papaniwala king balen king makalaban ya king upaya. Subali pa king nung makanyan, nung kaylangan tamu ing sikanan maygit king dangalan, dapat tamung Ion masalese nung kaninu tamu paniwala iting sikanan a alang angganan, iting kayupayan. E mu nanung sikanan karing gamat ding tau, taung mangmang, mitmung pamagimbut, alang nanu mang pangayanad king pamanugaling marangal, alang mesubuk nang dangalan, metung a sandata king gamat ning metung a mamulang busal ding keraklan a alang nanu mang pangasadya. Nanayun ku at buri kung paniwalan anti mo ikayu king ing kapamahalan kaylanga’ne iting takde, dapot pilina'na sanang mayap ing kayang gamat, pilina'no ring taung palalung mangaintulid; at anti na ning buri na ing mamye karing katungkulan a kaya na papamakatungkulan a kaya na papamahala ning balen, pakit na mu man sana king deti balu nong pamye karetang kareti dapat apaniwalan. I'Elias magsalita yang mitmung panandam; ding mata na kikislap la, at ing siwala na matimid a kalingking. Tinuki ing ditak a katahimikan; ing bangka, é na pipigilan ning bagse, anti ya mong panatag babo na ning danum. Ing bulan makaslag ya't anti waring magparangalan king asul ning banwa. Ding mapilan a sulu kikislap la king dake nang makarayu ning pampang.
"At nanu pa ing yadwan da?” nganang kinutang Ibarra.
"Kapanumanan karing pari,” nganang mekibat king siwalang malungkut Elias. “Ding pakakalulu manyawad lang pamagmasakit laban karing . . .”
