telakad neng makakalale ing anak a sugatan at dela ne king munisipyu. Linwal ing daya king asbuk ning kastila, e ne mimasmas at mete ya kaybat ning mapilan a penandit. Migmula na kanita ing dakal a sitsirya, ing salitang alang katutwan, at ing pengari mu inaus deng hereje at filibustero o talasalungat. Ing maging hereje metung a kealan palad nu man karing suluk, lalu na ketang panaun a ita nung kapilan ing alkalde ning lalawigan metung yang magparangalan banal Pangadya’neng masikan ing rosaryu at kayabe no pa ring ipus na, mekad ba’re mong tukyan ding aliwa. Dapot maging filibustero, talasalungat, igit dewakan kesa king hereje at king makamate atlu mang talapaningil a byasang sumulat, mamasa at makayntindi. Ding sabla tikusan de ing pengari mu. Kinwa ra la ring aklat na't kasulatan. Pemalsala ra kaya ing pamananggap na king pahayagan El Correo de Ultramar (Pahayagan a manibatan aliwang bansa) at karing aliwang pahayagan Madrid, ing pamipadala na keka karin Swiza ning Alemanya, ikwananan deng sulat at ing larawa'ning metung a paring miyatulan mate at nung nanu-nanu pang e ku na balu. Ing heganagana pemalsala ra kaya angga na ing pamisulud nang kamisa kabang ya atin yang kakawal a dayang kastila. Nung aliwa yang tau ing pengari mu miligtas yang agad. Atin mu namang metung manulu a minatul king ing kamataya’na ning metung a talapaningil pepauli ning dakal nang dayang tinulu (hemorragia). Dapot king uli ning masalapi ya, king uli ning pamanalig na king katarungan at ing sama na king nanu mang e matulid at e tampa, mipahamak ya. Aku, king kasaman kung dili ing mamakisabing mayap kenu man, pintalan ke ing Capitan General, ing tikya'na ning atyu ngeni keti, at pisyag kung e ya malyaring filibustero o talasalungat ing metung a taung tatanggap king pibalebale na kaninu mang kastila, karing maluka at kenu mang makipaglayunan, kabang kareti makabuklat ya ing pasbul na at makasadya ne man ins dulang na. Karing uyat na ning taung ini, ngaku, bubukal pa ing mapaglunus a dayang kastila, at king uli na pekibat ku ing bye ku at simpa ku ing kalukan ku at ing dangalan kung anti mong militar. Ing apala ku kaniti ya ing marimla rang pamananggap kaku, ing pamikawani ming e manayun at inaus da ku pang mayangin.”
