pisal. Keta mang minuna e ya magkumpisal dapot mikaluguran lang matalik at mekad iti atatandanan mu mu. Subali pa i’Don Rafael migit ya karangal at kayap a pusu nung karen mung kerakian a kukumpisal mung kukumpisal. Atin yang sariling matulid a panugali at parati nang sasabyan kaku ini, ngening apipisabi mi ing pamisunggalit da, ngana : "Ginung Guevara, paniwalan yung ing Dyos patawara’na ing metung a kapaslangan, anti mo ing pamakamate alimbawa, kaybat mung sinitsit iti king metung a pari, a metung mu namang tau a makikatungkulan milihim kaniti at king uli namu ning takut ning mikasalang manangnang ya king impyernus at iti labis nang pamanise? At pauli ning kadwaga’na, buri nang ikubling alang panganib ing kealan marinayan a depat na? Aku aliwa ku pamalak king Dyos,” ngana. ‘‘Para kaku e mu malyaring larinan mg marok king kalupa nang marok at e mipatawaran king kapamilata'ning tangis o king pamaglimus king pisamban.” At oyni ing alimbawa na: ‘‘Nung pete ke ing pengari ning metung a familia at uli niti milugmuk ya king palsimi ing mebalu at gewa kong lubas at daranup ding mcngulilang anak na a sadyang maligaya, mekabayad na ku kaya king alang anggang Justicia nung sakali bitayan da ku o kaya ikumpisal ku king metung a masikap kaniting lihim, o munye kung limus karing cura a e mangaylangan o kaya sali kung indulgencia o kapatawaran at managulele king aldo at benge? O ing mebalu at ding mengulila? Sabya'na kaku ning konsyensya ku ing sukat kung alilan iti king taung pete ku, idikil ku ing sabla kabang mabye ku king ikakayap na ning sapning milamang a kalma king uli ku, at kanyan man, kanyan man, ninung malili king lugud ning metung a asawa at king pakamal ning metung a igpa?” makanyan yang magmatulid ing pengari mu at ing dapat na at panugali king kapaniwala’nang yan kari'na panalumpakan at malyari tamung sabyan ing ala yang lepastanganan metung man. At e mu yan, pigpilita'nang patdan king dapat nang mayap itang mapilan a sasabya’nang e tampa ning nunu mu. Dapot magbalik ka ta king pamisungalit da ila ning cura. Iti mipataloto. I'Padre Damaso pematanira'ne king pulpitu at metung a mala ing e ne babanggitan a lagyu uling ing sabla malyari nang daptan king pikabalwa 'nang ugali. Aku akakit ku nang e masanting ing kaulya'na niti.”
