yang anti mong sundalus karing limang mumunang
utus, at king kanam at king kapulu ala mang malating
kasalanan, katumbalas ning kekami! Makananu ka
king yatu ngeni!”
At sinindya’ne ing maragul a kandila king Virgen de Antipolo at adwang malati king Nuestra Senora del Rosario at king Nuestra Señora del Pilar, makakalale neng kewani king metung a suluk ing metung a krus a marfil ba'nang pakilala kaniti king é la para kaya retang kandila. Ing Virgen de Delaroche é ya naman mika dake: metung yang dayuhan a é pikabalwan, at i’Darang Isabel angga ngeni ala ya pang dindam a milagru na.
E mi balu nung nanu ing milyari king pamagkumpisal itang bengi; gagalang mi la ring lihim a reta. Ing kumpisal makaba, at ing Darang ibat king marayu magbante king kayang pangunakan, apansing na king ing kura, king karinan a itingid no ring balugbug karing amanu ning masakit, ing lupa na ya ing makarap kanita, at balamu buri nang abasa karetang mangalagung mata ning dalaga ring kayang isipan.
Maputla at makamalmal a labi, linwal ya ing Padre Salvi king sidwan. Inyang akit neng madalumdum a kanwan at mitmung pawas, malyaring sabyan king ya ing migkumpisal at e ya ing mikabus.
“Jesus, Maria y Jose!” nganang mangurus ning dara ban isapula na ing marok a pamisip, "ninu ing makausta karing kayanakan ngeni?”
