"Sinabi ku nang keng aliwang aldo karin ta na
misabi kaniti uling ngeni ala kung panaun!” nganang
magkulangan kapibabatan Ibarra.
“Ala kong panaun ngene?” nganang mipnung pait kinutang Lucas. “Ala kong panaun lingun karing mete?”
“Magbalik na ka potang gatpanapun, kakaluguran...,” nganang mamigil Ibarra. “Ngeni atin kung yapang masakit.”
“Ah! King uli ning metung a masakit kakalingwan yu no ring mete? Galang uli ning pakakalulu kami mo...?”
Linawe neng Ibarra ba'yang tuknang sasabi. “E mu gigisanan ing kapibabatan ku!” ngana at saka ne melaus. Lalwa’neng meko Lucas at saka ya tiniman mipnung sama. “Kanyan makikilala king apu na ka pin nitang matwang mibilad kang tata ku,” nganang bubulung mingingitngit Lucas. “Mamagus pa karin uyat mu ing daya na nita.”
At nganang minaliwa siwalang tinuglung:
“Dapot nung mamayad kang masalese, mikaluguran tamu!”
