makibat. Kalulu neng da ing ninu mang mangatuliran!
Makanyan yang linabas ing aldo. Anti ning ala yang akabangga bale, ing asawa na kimbiran de, lain yang miraralakdak, at king salu na lubus mamuput ing mwa na at nung iti mibugnus, maging kasiran a maragul. Ing sablang makapadurut kaya duruku, kalupa ning pale king marangle ngening tyupa'ning mumuna nang sapul ning bagyu. Ala yang akalaban, ala yang akayarap, ala yang atuklasan a malyari nang bagsakan king sukal nang lub. Ding sundalus at ding utusan panginlagan de ngan.
Ba'nang é damdaman ing pamagsaya ra kilwal, pepasara no ring awang, at penabili'na king bante ing ala yang paluban ninu man. Tinali neng panyu ing buntuk na ba'yang é maspak, at bista man makaslag ya ing aldo pepasindi no ring sulu.
I’Sisa, ikit tana pin, sinukul de uling ngara ginawa yang kagulwan. Ing alperes ala yu kanita, inya ing alang kalmang Sisa, kinabukas ya king sukulan, makalukluk king metung a bangku anti mong alang nanu naman. Kabukasan ikit ne ning alperes at anti ning ketang aldo ita maliswas ya pa ing balen, pigaganaka’ne, at e na buring ating malyaring makasira kaya, penabili'na karing sundalus ing banten deng mayap, lunusan de at dinan pamangan. Makanya’nang linabas ning mamulang ing adwang aldo.
Itang benging ita, pauli na mekad ning angga kaya miras itang malungkut nang dalit Marfa Clara, o ning aliwang musikang dimdam na, i’Sisa man mekaganaka yang dinalit, ketang kundima’nang malambis, mayubu ning kayanaka’na. Pakirandaman deng e bubulad ding sundalus. Ay! detang kundiman a daralit na ning metung a mamulang gigisingan dang pasibayu itang maligayang milabasan inyang ing panaun e na pa lesunan ning bayung bye!
I'Donya Consolacion man dimdam na ing kundiman at abalu na nung ninu ing daralit.
"Papanikan ye yan, ngeni mu rin,” nganang minutus kaybat nang minisip sinaguli. Karetang labi nang malangi mamyalungan ya ing metung a timan a magdalang dakal a kabaldugan.
