'Bat kaya makasara la ring awang ning bale ning alperes? Nu karin la, kabang lalabas ing prusisyun, ing lupa nang tabas lalaki at ing kamisa nang pranelang Medusa o Musa ning Guardia Civil? Akiala na galang Donya Consolacón ing manawang nang itsura ning kanwa'nang gugulisan da ring uyat a mangaragul a nung nu tataluntun é ing daya nune ing pait ning sukal lub at itang maragul a tabakung panagaula ra ding muradu nang labi at ing mapangarirya nang panlalawe at king kusa nang sarili e na pignasan alinlanganan ketang makatakut nang itsura ing kasayahan da ring malda?
Ay! ali! Para kaya ing ganaka at ing masanpat a panamdam keta pang minuna ita, ketang Ginintuan a Panaun (Edad de Oro).
Ing bale malungkut ya uling ing balen magsaya ya, ngana ping Sinang. Ing bale ala yang parul, ala yang bandera. Nung ala ya mu itang sundalus a magbante sabyan tamung alang tau.
Ing mapunge sulu sisinaga'ne ing salang atmu kagutgutan at mayayakit la ring panagawlang kontsa a nung nu tinaid ing agi at migdatun ing alikabuk. I’Donya Consolación, anti mo ing sadya nang ugali, makakera yang mitutumpak a gamat, king metung a tabureting maragul. Makapiblas yang pagaldo-aldo, anti mo ing ugali na, maitsura. Makatali yang panyung malapad ing buntuk na at lalsut ing mapilan king bwak nang gutgut at makasalbag. Maka-kamisa yang pranelang asul, babo ning metung pang kamisang mekad maputi kanitang aldo at ing paldang melaslas papakit no ring payat at patag nang pwad at butit at gagalo yang alang tuknang. Payasuk yang mwa at paparas na ing
