"Ipakisabi na kekayu ning Kagalanggalang a Kapitan Heneral ing manaya ko saguli,” nganing talasaun na. "Malaus kayu, ginu, ngana king kayanakan a katuki na.
Itang tau Menila a sinabing griegu ing aral nang tagalug Padre Damasu linub yang maputla at gagalgal.
Ding sabla magmulala la. Marahil mwa yang tutu ing Kagalanggalang a Heneral nung inya pepapanaya' nong alang gulat ding prayli. I'Padre Sibyla ngana:
"Aku ala kung buring sabyan kaya. .. Keti manugse ku mung panaun.
"Aku man ala,” nganang mekyapus ning metung a paring agustino.
"Mako tana?”
"E kaya masanting ing pakibalwan ta pamu nung nanu ing nais nang daptan?” nganang Padre Salvi. "Kanita e ta namu makayaus pansing karing aliwa at malyari tang ipaganaka kaya ing katungkula’na king Relihyon. . ”
"Malyari nang lungub ing Kamalan yu nung bisa kayu!” ngana ning talasaup a milub ketang e byasang griegu. Iti naman linwal yang masaya.
Minuna yang linub i'Padre Sibyla, tinuki ya i'Padre Salvi, i'Padre Manuel Martin at aliwa pang pari. Memuge lang mipnung kagalangan subali mu i'Padre Sibyla a bista man binye na ing kagalangan dapot pepakit na ing atin ya namang ketasan. I’Padre Salvi naman king pamamuge na linabis ya karuku.
"Ninu karing Kamalan yu i'Padre Damaso?” nganang biglang kinutang at e no pamu pepaluklukan man ó pekipagmananwan anti mo ing piugalyan da ring taung maki matas a katungkulan.
"I'Padre Damaso pu, ginu, e miya kayabe!” nga nang mekibat halus malangi mu namang Padre Sibyla.
"Masakit ya pu itang talasuyu na ning Kamalan yu,” nganang mipnung kababan Padre Salvi. "Kaybat da kong pigayan at pekimalayan ing ala kong nanu mang kapanamdaman anti mo ing sukat karing talasuyu ning Ari at kenu mang taung maki pegaralan, dinatang kami king lagyu na naman nitang gagalang yung talasuyu a ngeni atyu king kapanamdaman...”
"Oh!” nganang sinabat ning Kapitan Heneral, kabang king metung nang bitis ipadurut ne ing metung
