Pauli ning milyari king pibalebale nang Kapitan Tiago miniral ing alinlangan at ding memalen é ra balu ing isipan da. I’Maria Clara é ya patugut tatangis at é na pikabyang ing aru na kaya ning dara nang Isabel at i’Andeng a anak ning meging sisiwa na. Binawal neng makisabing Ibpa na kang Ibarra anggang ding pari é ra baywan ing kayang pangatabi king pisamban (excomunion).
Bista'man niapagal neng sasadyang Kapitan Tiago ing bale na ba’neng tanggapan mipnung dangalan ing Kapitan Heneral, meyaus ya king kumbintu.
"E ka kikyak, anak,” nganang tya Isabel kabang pakislapa'no ring salamin ketang gamusang panguskus na. "E ka migaganaka uling baywan da mu rin itang excomunion' a inatul da kay&.. . sumulat la king Papa at itamu munye tang maragul a limus. Mebungsul ya mu i'Padre Damaso, é ya mete!”
"E na ka kikyak,” nganang sisitsit Anding, "akung bala ba'meng akasabi. Nanu na mung kabaldugan da deng pipagkumpisalan nung e ro sidya para karing mikakasala? Magkumpisal ka mu king kura mipatawara’na ka!”
Migbalik ya i'Kapitan Tiago. Panintunan da ketang lupa na ing pakibat king dakal dang buring ikutang, dapot ketang lupa na makalarawan ing kabigwan. Ing makalunus a tata mamawas ya, pupulisa'ne ing kanwa na king palad nang gamat at é ya makapagsalita.
"O mipakananu, Santiago?” nganang maliswas kinutang tya Isabel.
Pangisnawang saldak ing pekibat niti at layu'nang pinulis ing Iwa na.
