At yutus na karing memalen ing é ro pakyapusan detang é mayap a asal, nune panginlagan da la at pikasnukan, pablasang sikwil no ning pisamban.
"Pakirandaman yu ing sasabyan ding banal a kapulungan!” ngana. Potang ing metung a indyo asagana'ne king dalan ing metung a kura, iduku ne ing buntuk at yampang ne ing pago ban ing amung talan ya kaniti; nung ing kura at ing indyo pakakabayu la, ing indyo tuknang ya, magalang neng ilako ing salakut o ing kupya; king katatawlyan, nung ing indyo makakabayu ya at ing kura lalakad ya, ing indyo kuldas ya king kabayu at é ya myuman sake anggang ing kura é na sabyan "sulung!” o iti marayu ne king kayang paglakad. Iti ya ing sasabyan ding banal a kapulungan at ing é mamintu isakwil ne ning pisamban.”
"At potang ing tau makasake yang damulag?” nganang kinutang ning masugid a talapagobra king kayang kasiping.
"Kanita . . . sumulung ne,” nganang mekibat nitmg metung a mapamiru.
Dapot kasumangid da man ding gulisak at galo na gamat ning manaral daka'la ring matudtud o aliwa isipan, pablasang detang penaral ila mung ila nu man karin: meyala mung ulaga ing pamagkapilit ding mapilan a kosyang mangisnawang saldak o manangis pauli ring kasalanan ding alang pamaniwala, mepilit memigil pauli ning kakulangan kayabe. Ing kabud Hermana Pute mimisip yang makasalansang. Ing lalaking makalukluk siping na mipatudtud ya at mipasandal kaya at alamukut ne habitu: ing mayap a matwa diklut ne ing kayang swekus at king pukpuk pigmula'neng ginising at nganang gugulisak:
"Ay! dumayu ka, salbahe, animal, demonyo, karakaw, aso, kondenado!”
Mika gulu uli na niti. Tinuknang ya ing manaral, tinas no ring kile, magmulala ketang maragul a kagulwan.. Ing inge misusumangid linumud no ring amanu king kayang batal at ing arapat na ya mu mulyo at durugdug ding kayang gamat king tribuna. Iti mipakirandaman: ing matwang babai binili ne ing swekus, bubulung, mengurus pilan ulit at pasibayung misnang kabanalan siniklaud.
