sigarilyu, at maman a gewa ra ring taliring makinis ding
dalaga. Ing tabla kinintab anti mong salamin, karing
pasbul makabitin ing kortinang pinya at husi. Karing
awang naman pakasabit la ring parul a bubug o papil
a maki kule rosas, berde o malutu. Ing bale mitmu
yang bulaklak at masetas a makatuklu karing pedestal
a gawa China. Ding santus man makapiblas la, ring
larawan at ding relikya makanyan mu naman, pamagpagan
do alikabuk, lilinisan da ing kristal dang kalulanan
at karing kwadru ra makasabit la ring sampaga.
Karing dalan, e binang mikakandayu makatalakad la king sari-saring alkus ding kubul a maki balantuk a pengile kwayan. Iti mu babye nang ligaya karing anak. Makapatulug king patyu ning pisamban makabitin ya ing malapad at milalu kamal a tolda karing kwayan a telakad da. Lalam nyang toldang yan karin dumalan ing prusisyun at ken la mamyalungan masigla ring anak, lulundag, mitatagalan at nung misan mangagisi pa ing imalan dang sukat pakipagpista. King plasa naman makatalakad ya ing entabladung pilagen dang moru-moru ding tau Tundu. Ken mayakit ing makapagmulalang mangapalyari a e mu pikakunwan ilimpi karing milagru ding santus a e mapaniwala. Keng entabladung yan, magkanta la’t terak di Marianito, Chananay, Balbino, Ratia, Carvajal, Yeyeng, Liceria at aliwa pa. Ing pilipinu buri nang tutung alben ing drama-ng malungkut. Tahimik yang makiramdam king dalit, buri na ing terak at makapakayli. E ya pin Sana mamasyuk dapot e ne man papakpak. E na buri ing palage ra. . .? E bubulad, mamama ya mu at saka na no lakwan detang mapad manalbe. Mamisan-misan sasyo ya ing malda potang myuma la ring lalage dapot e lalabis karin. Ketang minuna drama mu ing palage a maki labanan balang kadwang penandit, metung a makapakayli at makatakut a ‘enkantu’. Dapot ding lalage ra Tundu milalaban la balang kalabing limang saglit, atin lang adwang makapakayli at pepalage lang myayaliwang e mapalyari inya mesambut la ring kumidyantis a manibat karing aliwang lalawigan. Ing gobernadorcillo maburi ya kanyan at ing pinili nang palage ra itang sinabi ning cura: 'Ing Prinsipi Villardo’ o ring pakung mebagut king marok a lukib (cueva), palage yang maki enkantu at fuegos artificiales. Mamilatan mung ditak titigtig lang titigtig ding kumpana
