Nobyembre dyes ngeni, kabispirasa’ning pista. E anti ing sadya-sadya. Ngeni ring sabla maliswas la, karing pibale-bale, karing dalan, king pisamban, king sabungan at king marangle. Karing awang pakabitin la ring bandera at panagawlang myayaliwa kule. Alang patugut ing akbung at ing musika. Ing amyam kakatmu ya king sigla.
Karing prutera makayapag la ring myayaliwang prutas ning lahi at ding bubug a lulanan mayumu maki masiglang kule yayus do ring dalaga babo ring mesang makatakap imalan a maputi at burdadu. Karing mu lahan magpalpatuk la ring tatyo, sasageuk la ring gayndung manuk at ding babi gigikgik la uling mababalisa la king alingongo ring tau. Ding utusan tipa-manik lang magdalang kasangkapan at kubyertus. Keni ating mipamalsala uli ning pinggan a mebalbal, keta naman kaylyan de ing dalagang-bukid. Misusumangid damdaman mo ring mumutus, ding misisitsitan, ding gugulisak, ding midadaldalan, ding manuksu, e la mipalabas inya ing sabla pawang inge at byung. At ing sablang kagulwan a yan pauli na mu ning dalo a sasadya ra king pamagtau, kakilala o e kakilala man at e ra na akit kapilan man, ban kanita apatula ra la mu at apakabsi ding datang a dayuhan, ding makipagpista mu, ring kakaluguran, ding kasalang, ing pilipinu, ing kastila, ing masalapi, ing pakakalulu at ing ninu mang bisang datang. E la man manayang pasalamatan at e ra man panayan king deta sanang pepakan da e ro palmuran pa kaybat. Deta mong makwaltang ibat Menila at dakal na ikit minyali lang serbesa, tsampan, at myahwang alak at panulam, a menibat Europa at kaybat e la man makatakman o makainum ditak man. Ding mesa ra magara la pangagayak.
