"King uli na nyan daratang ing dakal a kasiran. Ding mangatungkulan kakapinan do ring taung alang kasalpantayanan laban karing pekakatawa'ning Dyos!' nganang tinuglung ning franciscano at tinas no ring mangaragul nang kamau.
Nanu ing buri yung sabyan?” nganang minulit kinutang, makakulutun a kile at miganyung tinalakad ning tenyente.
"Nanung buri kung sabyan?" nganang minulit lalung masikan Fray Damaso at inarapa’ne ing tenyente. "Aku asabi ku mg buri kung sabyan ! At ing buri kung sabyan oyni: Kabud ing pari sikwil ne king kayang pikukutkutan mete ing bangke na ning metung a erehe, ninu man, agyang ing ari pa, ala yang matulid makyalam at lalu neng alang matulid mamarusa. At ing metung mong heneral.. . ing malating heneral. . . oh, kapahamakan!”
"Padre, ing kagalanggalang a heneral Vice Real Patronu ya!” nganang tinikdo ginulisak ning tenyente. “Nanu tang kagalanggalang, nanu tang Vice Real Patronu!” nganang mekibat ning franciscano a tinikdo mu naman. "Nung anti mu ketang minuna nibu ra ne king eran yan katulad ning gewa ra ding Kapisanan relihyoso king alang Dvos a Gobernador Bustamante. Ita ya ing tune panaun ning kasalpantayanan!”
"Sukat yung abalu king yan e ku payntulutan. . . Ing kamala’na ya ing pekakatawa’na ning Mayupayang Ari!”
“Nanu tang ari, nanu tang sundalus! Para kekami alang ari nune mu itang tune.”
"Tuknang kayu !” nganang ginulisak ning babalang tenyente anti mo neng karap mo ring sundalus na. "Balikan yu ing sablang sinabi yu o bukas a bukas isumbong da kayu king Heneral.”
"Sulung, ngeni mu rin, sumbung kayu!” nganang manyunung mekibat Fray Damaso, at lepita'neng makasakmal. "Ukulan yu galang uling susulud ke ining abitu, kulang ku. . .? Lumakad na kayu at malyari ye pang gamitan ing kakung saken!”
Ing pisasabyan minuli pang makapakayli, at salamat na mu memilitan ya ing dominico.
"Makamal,” nganang mayupayang mengamanu king siwala nang lulwal king arung a makabage karing
—10—
