Itang abak ning tutuking aldo, i’Juan Crisostomo Ibarra, kaybat nang linawe ing kayang gabun, minta ya king bale nang matwang Tasio.
Ganap a katahimikan ing manatili ketang hardin, pauli na ning ding sibad a sulasulagpo king taluktuk ning bubungan halus e la mararamdam. Ing lumut makapal na ketang matwang pader at detang kukulate tanaman maging panagawla’no ring awang. Itang pibalebale balamu santunga’ne ning katahimikan.
I’lbarra tinali neng makakalale ing kabayu na king metung a yasyas, at lalakad halus makatikad, biltanga’ne ing hardin, malinis at maingat a pangasese; penika’ne ing eran at, pauli ning ing pasbul makabusni ya, linub ya.
Ing mumuna nang ikit ya ing matwa, makarundung king metung a libru a nung nu balamu susulat ya. Karing dalig mayayakit la ring tinipun nang pepalanging mangalating sulasulapo ampon bulung tanaman, makayabe karing mapa ampon matwang estante a mitmung libru ampon kasulatan.
Ing matwa bina yang makapasubu king kayang daraptan nung inya e na apansin man ing panyatang ning bayntau nune inyang iti, ban e ne pangabalanan ginulut ne’t ume mako.
“O bakit? Ati’ko pala?” nganang kinutang makalawe kang Ibarra anting magmulala.
"Panupaya yu sana,” ngana niti, “akakit ku king bina kong maobra.”
“King kamatutwanan susulat kung ditak, dapot ini é pamiraplan at bisa ku namang paynawa. Atin kung malyaring arapat para kekayo?”
