Maranun á maranun migmisa ne i'Padre Salvi at
pepangumpisal ba'nong aligtas king makuyad á panaun
ding kaladwa ra ring mapilan á palpikasala. Iti e na
sadyang daraptan.
Balamu milako ya ganang mangan kaybat nong
binasa ring sulat á tinggap nang makaselyu at makaalakri,
uling merimla na ing tsokolati na at e na pa
inukuk.
"Masakit ya ing Amung,” nganing kusineru kabang misasadya yang aliwa pang tasa. ‘‘Pila’neng aldo é mamangan. Karing anam á pinggan á ulam á sasadya ku king mesa na, halus deta mang adwa tagkila'na la.”
“O neng e mipapatudtud,” nganing utusan. “Madalas yang maninap ibat ketang minalis yang katudturan. Mengalalam ne mata, lalati ya lupa aldo’ldo, at magkule neng kulyawan.”
Nung king bage makalunus yang akakit i'Padre Salvi. E ne tikman man ing kadwang tasa at e no tigkilan man ding putung ibat Cebu. Pasyal-pasyal ya ketang malwalas nang sala ning silid na at lemukut no karing gamat na ring sulat á pangkai basa’na. Bandang tawli, pepasadya ne ing sakya’na, mibablas ya at pepadala ya king pulu á nung nu ya karin ing pitakutan dang dutung uling nangan karin ing pistang tinatag da ring kayanakan.
Karas na king lugal, pepaulya'ne ing sekya'na, linub yang dili-dili king pulu. Makitid yang mayayakit itang gasgas pauli ra ring malabung á tanaman á papampan kaniti. Yang gasgas á yán paynturu ya ketang sapa á tutugtugan da ring myayaliwang sibul á manibatan king bitis ning bunduk Makiling. Karing pang-
