"Makanyan sana. . . oyan ing buri mo..!” ngara ring kayanakan at ding mangatwa naman ngara:
"Oyan ing masalese. .
"Nanung akwa tamu king paruminggung morumorung buri na ning tininti mayul? Nanung abalu tamu karing Ari ning Granada at Bohemia a papungut karing buntuk ding anak da o kaya isaksak do king bunganga ning kanyun at kaybat ing kanyun gawan de mong tronu? E ta naman Ari at e ta naman morus at ala ta namang kanyun.. Nung apusan ta la reta bitayan da kata pa Bagumbayan! Menakit na kang princesa, babaing makisalamuha keng labanan, a mamaliswag tabak keni’t keta, makibumi at makitabakan karing principi at magdilidiling lilibut karing bunduk a kakewan anti mong manintun king anting-anting ning tikbalang? Ugali tang katutubu ing malsinta king samyu na’t kahinhinan ning babai at kaybat talnan me ing gamat nyang babaing yan mitmu yang daya king pamakilaban agyang yang dayang daya na pa ning metung a higanting anate na. Kapilan man e taya gagalang at bibilang tayang marawak ing lalaking bubwat gamat king metung a babai, agyang principt ya pa, alferez o bastus a magbubukid. E wari manayun at malagu nung yang ipalage tamu ing katutubu tang ugali ba'tang umanan itang akit tang e mayap at gambulan naman itang manayon?”
"Oyan. . . alintana kanyan...,” ngara ring kakampi na.
"Atin yang matulid..." ngara ring mapilan a matwa.
"O ba’t kaya e ku aisip yan...?” nganang Capitan Basilio king lub na.
"Makananu yu mong arapat yan ...?” nganang kinutang ning metung a matwang masyas a buntuk.
"Mayan mu...!" nganing kitnan. “Magdala ku keni adwa lang kumidyang ukulan kung pamayapan da ring mangatwa pablasang king uli ning aral a tuturu ra at masiglang kalamnan ukulan kung ding marangal a maki idad nang makatagun keti pamayapan da la naman. Oyni ing pamuntuk na : Ing Alalan para Gobernadorcillo. Metung yang palage makatula a maki li mang pindwan (acto) a sinulat na ning metung a makatagun keti. Ing metung naman, maki syam yang
