I'Basilio melakwan yang mengaumun. Daramdama’neng kakaladkad a katawan king eran ing wali na, dimdam na ing gulisak, ing sapingil at ditak-ditak mimina itang daramdama'nang makapangablad a gulisak.
Ing koya makatalakad yang é bubulad. Makiramdam ya, makasilad a mata at makasakmal lang matalik ding kamau na.
“Kapilan ku malyaring sarul...?” nganang mingitngit at balus yang tinipa.
Karas na king koru mekiramdam yang mayap. Mirarayung daramdama’na ing gulisak ning wali nang mamaus: “Inang! Koya...!” At ala neng bitasang dimdam kabud misara ya ing metung a pasbul. Gagalgal, mipapawas, tinigil ya sinaguli. Kinet ne ing kamau na ba'nang kumpitan itang gulisak a magpiglas tumakas king pusu na at ing panimanma’na lilipo king dulum ning pisamban. Karin undap-undap yang makasalaing ing suluging-laru, libutad ati yu ing tumba, ding pasbul makasara la ngan at ding awang makirehas no mang bakal.
Mekabulad, inukyata’neng bigla ing eran, lebasa’ne ing kadwang pisu nung nu ya makasindi ing metung a kandila at tinaglus ya king katlung pisu ning kampanaryu. Kelag no ring lubid a tatali karing batinting ding kumpana at kaybat maputla yang tinipang pasibayu at ding mata na kikildap la dapot e uli ning Iwa.
Ing uran kanita migmula nang tinila at ing banwa ditak-ditak sasala ya. Bitnula’no ring lubid at ing metung dang wakas tinali ne king metung nang tagyang ning barandilyas, migpatagusgus ya king dulum kilwal at é na ne aganaka mang pitda itang makasinding kandila.
Mapilan mung penandit kaybat, king metung nang dalan ning balen meramdam ing adwang akbung. Alang meligalig kaniti inya ing katahimikan miniral pasibayu.
