“Atlung pulu't adwang gamat...” nganing koya.
Mipamulala ya i'Crispin at lalwano ring mangalati nang gamat.
“Atlung pulu’t adwang gamat. . .” nganang minulit. “Anam a gamat a adwang taliri, at balang taliri metung a kwarto. Indu ko! Karakal a kwalta . . .! E mo abilang king atlung aldo at asali mu nong sinelas ding bitis at makapagkupya na ka ngening mapali ya ing aldo at maragul a payung nung muran at pamangan, imalan pa para keka at kang Inang at. .
I'Crispin minisip yang pepasibayu. "Ngeni ku sisisyan nung ba’t e ku menako. . .!" "Hoy, Crispen. ..!” nganing koya at sebyana'ne "E ka mimimwa, koya. Sinabi ning cura patya’na kung barug nung é ko apalto ring kwalta. O nung penako ku la apalto ko sana ... at nung mate ku man makasali ku mong imalan mu man, ika ampon i’Inang! Oh! nung penako ku la mo ...!”
Ing koya é bubulad. Inigut ne ing kayang lubid. kaybat nganang mangisnawang saldak mekibat:
"Pitatakutan ku mung akamwa’na kang Inang kabud abalu na iti!”
“Akamwa’na ko ...?” nganang misdan kinutang ning wali. "Sabyan mung pemaluka ra ku at pakit ku naman ing late ku king gulut at ing gisi kung bulsa. Ing kwalta ku metung ya mung kwartu, ing binye ra kaku keta pang Pasku. Ita man kinwa ne pa ning cura napun. Kanita ku pa menakit metung a kwartu, kasanting na...! At i’Inang é ya maniwala, ali é na paniwalan...!’’
“O nung sabya’ning cura...”
Kinyak ya kanita i'Crispin at nganang sisiguk: "Nung makanyan, ika nang muli, aku malakwan ku. Sabyan mu namu kang Inang mesakit ku. E ku bisang muli...”
“Aba! é ka kikyak, Crispin. ..” nganing koya. “E ya maniwala i’Inang, é na ka kikyak. E mu dimdam sinabi nang matwang Tasiu atin katang makasadyang apunan a manyaman...?” “Apunan a manyaman...? Aku é ku pa mengan. E ra ku buring pakanan anggang é la lunto ring adwang onza... At nung maniwala ya i’Inang, sabyan
