nu ia gom in Pibuluchi fin ha cama cha quit oncat
Yl cag soga iap pinu lu ch ih ca na pihga, Pin ballaiɮ,
na ga iago min, Pin balaiɮlit, alin chi an china ama
li min, Anin chiɮlit pi cu mahliga, cumalih hga
cumah li hin hima, haulaba, 88 hitoc he nero
canacaio, quan pin tafun Aba lah chi ta fun canaca
io lot pi pichat, pi filiscat, Dios Yhlialilga min nos
ansli amali apu lu manac iagomin, amali Yfat liani
nialcat hanim aca masa chit, hasnu hachin Yalilga
pula qui min, han mahlin guan ga na ihca. cu mah li hin,
holahta iactocaio, noc ama li Yfat apia fis tai lac hin, Y
ma cat hasca maquin, oc chiquiti a pila, San Mar cos.
canacaio guat pi cha hin, cas tillo, ca, no mi tac ca, al tut
Ynglesi Yntibinac Ysiquin, oh cumaga lap noc moh
lac ioga Yhta qui Ymo gacapi ihtamin Ynglesica lat
hachiuit unlataca, castilloca, torre canacaioca un slail
na tih can, soldadoh los min, has nuh los min altut Yn
glesi la ih tama, Yhtibit ataia man cumaɮ tachihi
Yhtama maquit iap cat has ca ago viga ihga, Achit
magomin, San Luis tafun chic cama sac hin un na
ligui, han ca nos Yfat unac mahlit aglaɮ ifat vt ha chipi
lat un tahca. noc tulu oncalica inaha bat na liqui. Picu
mah coɮli hin, ma quili qui cat, pifan fihlo soco noh ca vn
lac guan gat Yl caih ca quan to caiagmin, Yfan fihlat
pin puhat has a ago viga ihga. cumah lihga, cumah
li hin Pin holahta chuba pin Rey pulaqui Yh cana pi
Dios piɮqui nacaio, nihtagami la nag ma hachimacat
ihquit cat hachin nutat hachia pilat guan gat Ylcaihga
achit. Magomin, holahta Governadori hima pima cat
hos cacaio, Don Diego quiroga. canacaio, nan gustini soco nuh
ca maquin, holahta slin hanac man, nih taga hultina
Ymacat hos cacaio, Ygua sbichit. uni itih capi, acubitlit,
ima ca natag hita ⸮ quah canacaiac min hachin
nu tat ha chin gua gant insaihga, Yalilga Ynaha
bat ih quica on cana min, sa capi ifoga, ma quit ih
capi han caɮ nali qui quan ti qui lihga, puhat Y
tag lat has caho, Dios Yhta nasat slin hat hos ca
ago vigaihga. S. Luis ta fun qua qui la, Aba lah chi,
holahta buo ungia, hachin choɮt Yl caih ga hahlaua
1688 hitoc qua lali henero canacaio naihtaga 21&
hachin su pac loc hachi ia pulaqui in nutat focomb
guan ga caia =D. Matheo chuba + holahta Ju. Mendoza
Dn. Bra. ybita chuco holahta
Don Alonso pastrana casique de Petale
D.on patricio casiqui De santa cruz
D.Ygnacio casique De talpatqui
