dagiti sakristan inawatda ti garawna a maysa a bilin ket inda
rinipkan dagiti ruruangan; ti alperes nagdanag ket nagngata no
rumuar wenno agbati met laeng, ngem ti agsermon rinugyannan
ti nagbitla iti napigsa, namsek ken natbag a timek: awan duadua
a daydi daan a despensera, nalaing a mangagas.
"Naraniag ket makapurar ti altar, nalawa ti ruangan a dakkel, ti angin iso ti luganan ti santo a sao ti Dios nga agruarto iti ngiwatko, dumngegkay, ngarod, dakayo kadagiti laplapayag ti kararua ken puso, tapno dagiti balbalikas ti Apo saan da a matnag iti daga a kabatbatuan, tuktuken dagiti tumaytayab ti Inpierno, ngem rumusing ket dumakkelda ket di, kas nasantuan a bin-i, iti daga ni daydayawen ken naserapinan nga Ama tay a San Francisco! Dakayo, dadakkel a managbasol, kinayawan dagiti tirtirong ti kararua, a nagsaknap nga agranggas kadagiti tataaw ti biag nga agnanayon, a silulugan kadagiti nalagda a sasakyan da lasag ken lubong, dakayo a napaamitan kadagiti kawkawar da gartem ken rugit ket aggagaudkay kadagiti barbarañgay ni Satan a nainpiernuan, kitaenyo sadiay a sidadayaw ken sibababawi dayta mangaon kadagiti karkararua iti pannakaadipenda iti sairo, dayta natured a Gedeon, dayta maingel a David, dayta nagballigi a Roldán ti Kakristianuan, dayta nailangitan a guardia sibil, a mamaingel nga adayo ngem amin amin dagiti sibil a natiptipon, nga adda ita ken addanto iti kasakbayan" (Ti alperes pinagkuribetbetna ti nag. baetan dagiti kidkidayna)-"wen, apo alperes, mamaingel ken mannakabalin, a idinto ta awan sabali a paltogna no dila maysa a krus a kayo, pinarmekna a simamaingel ti agnanayon a tulisan dagiti amin a sipsipnget ken amin dagiti buybuyot ni Luzbel ket inna kuma ida pinukaw amin no saan a gapo ta dagiti espíritu saan da a matay! Toy pagsiddaawan a pinarsua ti Dios, toy nakaskasdaaw a di mabalin a panunuten, iso ni nainggasatan a Diego de Alcalá, iso, a no idilig, ta ti panamagdidilig tumulong a nalaing iti pannakaawat dagiti banbanag a saan a maaw-awatan, kas kinuna ti maysa, kunak, ngarod, a toy naindaklan a santo, maysa laeng a maudi a soldado, wenno ranchero kuma iti mannakabalin unay a gimong mi, a manipod sadi langit ipanguluan ni naserapinan nga Ama tayo a San Francisco, gimong a pakaidayawak a pakikappunan a kas kabo wenno sarjento, babaen ti grasia ti Dios."
Dagiti nanengneng a indio, a kuna ti pannakabagi ti pagiwarnak, awan naawatanda no saan a dagiti sasao a "guardia sibil, tu-
