Ni Ibarra adda iti maysa a suli; ni María Clara adda a sipaparintumeng iti asideg ti altar mayor, iti maysa a disso a gapo ti ayat ti kura inna pinawayaan kadagiti sakristan. Ni Kapitan Tiago, a nakaprak, nagtugaw kadagidi bangbangko a naipudi kadagiti agturturay, a iso ti gapona a dagiti ububbing a saan a makaam-ammo kenkuana, kunada la no maysa met a gobernadorsilio, ket dida maitured nga asitgan.
Idi kuan, dimteng ti apo Alkalde ken dagiti nanguyog kenkuana, a naggapuda iti sakristía, ket nagtugaw iti maysa kadagidi nakasaysayaat a palangka a naikabil iti rabaw ti alpombra. Ti Alkalde inkapetna ti kawesna kadagiti dadakkel a ramrambak ket inkabilna pay ti banda ni Carlos III ken uppat wenno lima a krus.
Dagiti tattao saan da a nailasin.
—¡Ni!—kinuna ti maysa a taga talon;—¡maysa a sibil a nagkawes iti aruat ti agkomedia!
—¡Ang-ang!— insungbat ti kinadennana ket inna kinidag; —iso dayta ni Prinsipe Viliardo a nakitatayo idi rabii idiay pagbuyaan!
Ti Alkalde ngimmato ti galadna kadagiti tattao, ket nagbalin a maysa a prinsipe nga enkantado a mamarparmek kadagiti jigjigante.
Nangrugi ti misa. Dagiti situtugaw timmakderda, dagiti matmaturog nagriingda gapo iti kil-li-ing dagiti kamkampanilia ken iti natbag a timek dagiti kantures. Ni Padre Salvi, nupay nadeggang, kas la sirarag-o unay, a ta ti diákono ken ti subdiákonona, duada nga agustino.
Tumunggal maysa nagkanta, idi nadanon ti batangna, iti nasayaat, iti daytay timek a rumuar iti agong ket saan a nalawag ti pannakabalikasna, malaksid ti agmisa, ta ti timekna mamigerger bassit, ket namin-ado a nagdesentonado, a napalalo a siddaaw dagiti makaam-ammo kenkuana. Nupay kasta, nasayaat ket nataraki ti panaggunayna; no agdominus bobiskum, ti pamayanna makaawis iti panaglualo, itingigna bassit ti ulona ket kumita sadi ngato. No makita a maasukan ti insienso, mabalin a kunaen a ni Galeno pudno ti pagaropna a ti asok magna kadagiti ab-abot ti agong a inapan iti ulo ket labasanna ti etmoides, ta aglintegman, iliadna ulona, sa magna a mapan iti tengnga ti altar a kasta
unay a kinadeggangna, ta ni Kapitan Tiago inna nakita a nadegdeggang pay ngem daydi insik a nagkomedia iti kasangwanan
