ti pannakibakal a maymaysa kadagiti amin nga adda; awan mangbabalaw iti mangyurit a mapan sumalinong iti maysa a kuala no
umay ti bagyo. Ti panagdumog, no umay ti bala, saan a kinatakrot; ti dakes iso ti panangsaranget tapno matuang ket saan
danto a bumangunen.
—¿Ket toy a panagrigat innanto ngata ited dagiti ur-urayek a bungbunga?—sinaludsod ni Ibarra;—¿patiennak ngata ti padi ket malipatanna ngata ti inaramidko kenkuana? ¿Tulungandak to ngata a pudpudno iti pagimbagan ti panagsursuro, panagsursuro nga iso ti kainnagaw dagiti praile kadagiti kinkinabaknang toy a daga? ¿Saan da a mabalin aya ti kasla mangipakita iti pannakipagayamda, kasla mangipamatmat iti isasaranayda, ngem iti pasukib, iti sipnget, inda gubaten, dadaelen, sugaten iti mukod, tapno matuang a nalaklaka, ngem no inda sarangten a kasango? Ikadagiti kunayo a naar-aramiden, mabalin amin a urayen ti kasta!
Daydi lakay nagulimek ket saan a nakasungbat. Nagpanunot iti nabiit, sana kinuna:
—No kasta ti maaramid, no di agbalin ti gakat, liwliwaennakayto ti pannakalaglagip a inpaayyo iti amin a kabaelanyo, ket uray pay no kasta, addanto la sangkabassit a maala: iti panangikabil iti umuna a bato, iti panagmula kalpasan ti bagyo, nalabit nga adda maysa a bukel a tumubo, saan nga anuden ti layos, ket iso ti mangispal iti pannakapukaw a maminpinsan ti bukel ket isunto ti paggapuan ti bin-i nga innanto imula kadagiti annak ti natay nga mula. Ti aramidyo, mabalin a isunto ti mangpapigsa iti nakem dagiti dadduma nga isuna la a kabutengda ti mangirugi.
Ni Ibarra, pinanunutna dagitoy a sasao, nakitana ti kasasaadna ket naawatanna a, numan pay kasdi a nalidem ti panagkita daydi lakay, pudno unay dagiti sasaona.
—¡Patienkayo!—kinunana ket pinetpetanna ti ima daydi lakay. —Saan a barengbareng ti innak panaguray iti naimbag a patigmaan. Ita met laeng, innak kasarita ti kura, nga iti kamaudiananna, awan met inaramidna kaniak a dakes ket nalabit a naimbag met, ta saan da met amin a kas ti nangidadanes idi ama. Innak pay kasarita maipanggep iti daytay daksanggasat nga agmauyong ken dagiti annakna: lagtalekak iti Apo ken kadagiti tattao!
Nagpakada iti lakay sa simmakay iti kabayona, ket pimmanaw.
— 201 —
