Ni Ibarra nabayag bassit a nagpanunot, sana insungbat:
—"Ti patigmaanyo, naimbag, ngem narigat a suruten." ¿Diak ngata mabalin a ipatuloy ti aramid ko nga awan ket ti mangkumot kenkuana a sipnget? ¿Saan a mahalin aya a ti imbag ti lumusot iti uray sadinno, tangay ti pudno dina met masapol ti bumulod iti kawes iti ulbod?
—¡Awan mañgayat iti pudno a sibabatad a gapo iti kasta! —insungbat daydi lakay. -Dayta, nasayaat, no sasao laeng, mabalin a maaramid iti lubong a tagtagainepen dagiti agtutubo. Addayta ti maestro ti eskuela a nagbanbannog iti ur-uray; nagpuso iti puso ti ubing a kinayatna ti imbag ket awan sabali nga inna inapit no di panagang-angaw ken pagpagaak. Kinunayo kaniak a kas kay ganggannaet ditoy iliyo, patiek. Nanipod idi immuna nga aldaw ti sangpetyo, rinugyanyon a sinugat iti tangsit ti maysa a padi nga adda damagna a nasingpet kadagiti tattao, ken masirib kadagiti kakaduana. Sapay kuma ken Apo Mugna ta toy a inaramidyo saan a iso ti nangeddeng iti gasatyo iti kasakbayan. Saanyo a pagarupen a gapo ta dagiti dominiko ken agustino inda uy-uyawen ti abito a ginggón, ti barikes ken ti nalaad a sapatos; saanyo a pagarupen a gapo ta inpalagip naminsan ti maysa a doktor sadi Santo Tomás a ni Papa Inocencio III inna kinuna a dagiti al-alagaden dagiti pransiskano adadda a mainumuda kadagiti babbaboy ngem kadagiti tattao, isuda saanda nga agtitipon amin a mangpaneknek iti sinao ti maysa a prokurador (manarawidwid iti sanikua dagiti praile): "¡Ti kanumuan a lego adadda ti mabalinna ngem ti Turay agraman amin a sosoldadona." !Cave ne cadas! (Agannadka ania ta matnagka!) Ti balitok, mannakabalin unay; daydi baka a balitok namin-ado nga inna tinippuog ni Apo Mugna kadagiti al-altar, ket nanipod pay kadagidi al-aldaw da Moisés.
—Saan unay a nasipnget ti panagkitkitak ket diak met patien a napeggad unay ti panagbiag ditoy ilik,-insungbat ni Ibarra nga immisem. Kunak a dagita a butbuteng napalausda bassit, ket inanamaek a matungpal amin dagiti tartarigagay ko, a di ket dakkel ti tubeng iti dayta a bangir.
Wen, no igayatda ti imada; saan, no ilisida. Amin dagiti pigpigsayo a mangikalkalikagom indanto maidungpar kadagiti diddiding ti konbento, apaman a wagwagen ti praile ti barikesna wenno ti abitona; ti Alkalde, a ti la inna maipampambar, dinanto
