agiti bangbangka nagturungda, ngarod, iti maikadua a pasabing ket naipapilit a nangisaang manen ni Andeng iti sabali a pagabrawan.
Umal-aldawen; pumugson ti pul-oy; agriingen dagiti daldalluyon nga agkutikutida iti lawlaw ti bangkay ti buaya, a daytay inda parasuken dagiti sibsibo a banbantay a pagraniagan, ti lawag ti init, a naramenan kadagiti amin a buybuya, a kuna ni dumadaniw a P. A. Paterno.
Ti musika nagsubli nga immaweng. Ni Iday agtuktukar iti arpa; dagiti lallaki agtuktukarda met kadagiti korkordion kada gitgitarra a pasaray inda agsusurot, pasaray saan, ngem ti nasaysayaat ti panagtokarna iso ni Albino, ta kuradrad a kuradrad, saanna a maisurot ket pasarayna mapukaw ti kumpas, wenno saan, mayallatiwna iti sabali a tuno.
Napanda iti maikadua a pasabing a napukawcn ti talekda; aduda dagiti manginanama a sadiay inda masarakan ti asawa ti buaya; ngem ti Nakaparsuaan narabak, ket kanayon a mapunno ti sagap, no itaudda.
Ni ikit Isabel agbilbilin:
—Ti ayungin, naimas a masigang; ilasinyo dagiti bukbukto, ta maeskabetseda, dagiti daldalag ken bulan-bulan, mapesada: ti dalag napaot ti biagna. Ikabilyo ida iti iket, tapno agyanda pay la iti danom. Dagiti paspasayan itartarusyo ida iti pariok! Dagiti purpurong maitunuda, a mabungon iti bulong ti saba ket maselselanda iti samatis.
—Bay-anyo dagiti dadduma tapno agawisda: saan a naimbag a paminpinsanen nga alaen amin dagiti adda iti pasabing, — sana innayon.
Idi kuan, kinayatda ti simmang-aten a mapan iti daydi bakir a napunno kadagiti lallakay a kaykayo a kukua ni Ibarra. Sadiay, iti linong, ken iti igid ti kasla sarming a waig, isunto ti inda panganan iti babaet dagiti sabsabong wenno iti linong dagiti naaramid a sapsapaw.
Ti musika umaw-aweng iti tangatang; ti asok dagiti daldalikan agpangato a siraragsak nga narasay nga alipugpug, ti danom agkankanta iti uneg ti tayab a bumarbara, nalabit dandaniwanna iti makaliwliwa dagiti natay a ik-ikan, nalabit pangum-umsi ken
pangrabrabak; ti bangkay ti buaya mabalbaliktad, no kuan, ipa-
