Ni Sisa ken dagiti annakna awanen nakasangsango.
No ita ta intay iti balay ni Maria Clara, maysa a nataraki nga umok iti nagbabaetan dagiti susua kada al-allangigan, madanuntay pay laeng dagiti dua nga agayan-ayat, a nakatamdag iti maysa a tawa a pakatannawagan iti danaw. Ti balay nasalinungan kadagiti sabsabong ken mulmula nga agkalkalatkat kadagiti kawkawayan ken barbarot nga adda apagapaman a banglo nga inda isaknap.
Dagiti bibbibigda agtantanamitimda a mangibalikas kadagiti sasao a nain-inayad pay ngem ti anasa-as dagiti bulbulong ket nabangbanglo pay ngem ti nasayamusom a puyupoy nga agayayam iti minuyungan. Iso ti kanito nga, iti inda panaginana iti napardas ken apagapaman a raniag a ibakal ti init no lumnek iti malen inda panangitaod kadagiti badbaddi iti danaw kadagiti naragsak, babassit a ul-ulo da iti rabaw dagiti daldalluyon, ta inda siddaawen ken kablaawan kadagiti dandaniwda a ti init ngannganin matay. Kunada a dagiti matmata ken bubuokda, balbagda, nabalangatanda kadagiti mulmula nga agtubo iti danum a nagsabong iti puraw ken nalabaga; kunada a pasaray ipadlaw ti puraw a sibo ti danum dagiti kasla tinubtubay a bagbagida, a napudpudaw pay ngem ti sibo ket, no daytay nakapagtangepen a naminpinsan ti rabii, inda rugyan dagiti nadiusan nga ay-ayamda ket inda ipangngeg dagiti nakaim-imas nga aw-aweng a kas la aggapo kadagiti arpa eolia; kunada pay. . . ngem subliantay dagiti dua nga agayan-ayat ket intay denggen ti paggibusan dagiti sarsaritada Ni Ibarra kunkunana ken Maria Clara:
—Inton bigat, kasakbayan ti panagbettak ti bannawag, matungpalto ti kalikagommo. Ita a rabii saganaek amin tapno awan agkurang.
—No kasta, suratak dagiti gagayyem ko tapno umayda. !Aramidem a daytay saan a makasurot ti kura!
—?Ket apay?
—Wen, ta kasnak la sisiimcn. Ranggasandak dagiti matmataria a nauneg ken nalidem; no iperrengna ida kaniak, mabutengak. No kasaunak, ti timekna kasla... ti la adda nga inna ibagbaga kaniak a dagitay banbanag a paspasaray, saan a maawatan, naidumduma . . . sinaludsudna kaniak naminsan no awan tinagtagainep ko a sursurat daydi ina; atapek a pangmamauyungen. Ni gayyem ko a Sinang ken ni Andeng, kinaskasusok, kunada nga
