Di nabayag, simbrek ti gobernadorsilio, a rupana ti makalukluksaw: iso met la daydi nakitatay idi kalman a nagiggem iti sangaarroba a kandela. Idi simbrek, nagsardeng dagiti tantanabutob, tumunggal maysa timmugaw, ket nangin-inot a inda nagulimek.
Nagtugaw ti kapitan iti dakkel a tugaw a naikabil iti babaen ti ladawan ti Ari, simmay-a iti naminpat wenno naminlima, inyaprusna dagiti im-imana iti ulo ken rupana, insadagna dagiti siksikona iti rabaw ti lamisaan, inikkatna ida, nagsubli a nagsay-a, ket kasta a kasta.
— Appo!,—kinunana idi agangay a timekna ti nakapoy unay, —nagturedak a nanga-ngay kadakay amin a tumabuno itoy a purok . . . ejem! ejem! . . . rambakantayo ti piesta ti patron tayo, San Diego, inton 12 toy a bulan . . . jejem! jejem! . . . Ita, addatay iti maikadua nga aldaw ti bulan . . . ejem! ejem!
Ket ditoy naguyek iti nabayag ken namaga, iso a namagulimek kenkuana.
Iti kasdi, timmakder iti yan dagiti lallakay ti maysa a baknang nga agtawen ngata iti uppat a pulo, natangsit ti langa na. Iso daydi ni nabaknang a kapitan Basilio, kabusor daydi natay a don Rafael, maysa a tao nga agkunkuna a nanipod idi natay ni Santo Tomas de Aquino, ti lubong di pay immaddang iti sango iti uray la no maysa, ket nanipod met idi pinanawanna iti San Juan de Letran, dagiti tattao nangrugida a simmanod.
—Ipalubusyo kuma, Senioras, nga agsao-ak iti maipapan itoy banag a ingget pateg,—kinunana. —Siak ti umuna nga agsao, nupay addada sabsabali kadagiti adda ditoy a sisasaklang a nangnangruna ngem siak nga addaan iti kalintegan, ngem siak ti umuna nga agsao, ta kunak a kadagitoy a banbanag, ti umuna nga agsao, a ibaga nga iso ti umuna, a kas met ti maudi a sumao saanna kayat kuma nga iso ti maudi. Maysa pay, dagiti banbanag a innakto ipalawag napategda unay ket saanda a mainumo a mabaybay-an a maipaudi ket iso ti gapona a kayatko kuma ti umuna nga agsao tapno maited ti katutupanna. Ipalubusyo kuma, ngarod, Senioras, a siak ti umuna nga agsao itoy a purok, iso a pakakitaak kadagiti ado a tattao a nalatak unay, kas ni apo kapitan nga agdama, ni kapitan pasado, ni idaddadumak a gayyem, don Valentin, ni kapitan pasado, ni kinaubingak a don Julio, ni agdindinamag a kapitan ti kuadriliero, don
