a makangngeg patienna unay a dagitoy nga ay-ayop makitada dagid karkararua ken dagiti an-anniniwan. Ngem dagiti as-aso ken
dagiti sabsabali pay nga agay-ayam saan da a makita dagiti sensennaay dagiti rigrigat dagiti tat-tao, ket nupay kasta, Inagado dagiti inda sagsagabaen!
Sadiay adayo iti ili, nga adda ngata baetna a maysa nga uras, iso ti yan ti taeng ti ina da Basilio ken Crispin, asawa d maysa a lalaki nga awanan puso, babai a mangikagkagumaan iti inna panagbiag gapo kadagiti annakna, idinto ta ni asawana adda nga agbaybayanggudaw ken agpalpallot. Manmano no agkitada, ngem kanayon la a nasakit. Ti lalaki innalana aminen dagiti sagbabassit a balbalitokna nga inna inibos iti dakes, ket idi ta awananen ni naanos a Sisa iti uray la no ania a panarakenna kadagiti kinkinadakes ni asawana, ison, rinugyan tuyen a kinabkabil. Piman ta nakapoy ti kababalinna, dakdakkel ti pusona ngem ti utekna, iso awan sabali nga ammona no di agayat ken agsangit. Kenkuana, ni asawana iso ti diosna; dagiti annakna isuda dagiti an-anjelna. Ti lalaki, ta ammuna ti panagayat ken panagbutengna kenkuana, aramidenna met d kas aramid dagiti amin a sinandidios: tunggal aldaw lumalo ti kinaranggas, kinakuspag, kinauyongna, a ti la adda a kaykayatna.
Idi inyuman kenkuana ni Sisa, iti naminsan a nagparang, a rupana ti awan pay kasdi ti kinasipnget, ti rantana mamagsakristan ken Basilio, intuluyna nga inapru-aprusan d manokna, wen, saan, dina met kinuna, ket isuna la a sinalududna no ado ti maalana a pirak. Ni Sisa saanna a naitured a inulitan, ngem ti naglabes a rigatna ken ti kalikagomna a dagiti annakna masursuruda ti agbasa ken agsurat iti pagadalan ti ili, isuda d namilit kenkuana a nangtungpal iti gakatna. Ni asawana kaskasdi nga awan saona.
Iti daydi a rabii, iti maikasangapulo ket gudua wenno maikasangapulo ket maysa nga uras, idi ta dagiti bitbituen agraniagdan sadi langit a winaknitanen ti dawel, ni Sisa adda a situtugaw iti rabaw ti maysa a bangko a kayo, nga inna kitkitaen dagiti apagapaman ti seggedda a sangsanga a naisungrod iti dalikan, a bato a nabiag ken nagsulisuli. Iti rabaw ti maysa kadagidi a daldalikan adda maysa a banga a bassit a pagap-apuyanna, ket iti rabaw dagiti begbeggang adda tuntunnuenna a tallo a tuyo, a dagitay tallo ti maysa a siping.
