Page:Charles Lamy - poèmes en patois Kimberlot.djvu/32

From Wikisource
Jump to navigation Jump to search
This page has not been proofread.


MASON VIDE


———


Après sin gloria cheull’ vielle,
L’ timps que s’n homm’ feume s’ pipe à l' cour,
S’assit dins ch’ fauteul et sommelle
In t'naint ch’ cat jouqué su s’n écourt.


Ch’est deux bonn’ gins, juss’ du même âche,
Et bin qu’y n’a pus d’ quarainte ains
Qu’y sont mariés, ch’est in ménache
Aussi d’accord qu’aux premiers timps.


Dins leu mason v’naint d'héritaince
Y viv’t à rien faire ayaint d’ quoi,
In sint qu’ tout est in abondaince
Comm’ si ch’étot l’ mason din roi.


Ch’ l’homm’ fait tout chou que s’ fémm’ li d’maine,
Elle n’ sarot rien li r’fuser,
Y va d’ bon coeur d'u qu’ ch’est qu’a l’ mène,
Sins s’n homme a n’ peut pus s’amuser.


Et d' les vir passer dins la vie
Parels à des jônn’s amoureux
Même ch’ ti l’ pus eximpt d’invie
R’grett’ de n’ pont ête aussi hureux.


Hureux ! y ne I’ sont qu’a tiott’ dose,
Et leu biau r’frain n’a pont d’ couplet,
Car d’puis du timps y mainq’ queuq’ cose
Pou qu’ leu bonheur seuche au complet.