This page has been proofread.
- VISIONS
- — — — —
- A mes chers enfants.
- Dins les timps ch' démon in colère
- D'avoir vu chés humains trop bons,
- Pou lieu fair' tint et pus d' misère
- Volut sur tierr' déqueinn' d'in bond.
- A don suivaint s' dégrioloire,
- Chés vints d'amont, chés vints d'aval,
- Jusqu'à s'n arrivé' dins l' nuit noire
- Ont fait in tapache infernal.
- Quéu jusse au d'zeur d'eun' bonn' ville,
- Su l' pointe d' cloquer d'in catiau,
- Y s' ramintuvot pus trainquille
- Intortillé dins sin maintiau.
- A cavalo su l' girouette
- Qu'y laichot à sin gré torner,
- Pindaint qu' su s'n épaule eun' chouette
- Hurlot des cops à fair' treinner,
- Y n' bougeot pus, creusaint s' cervelle,
- Cafouillaint d' qu'au fond sins trouver
- Eun' saquoi d' méchainc'té nouvelle
- Pou débaucher ch' l'homme à l' querver.
