lantjèng sè èpamènta'aghi ana'na djărèja orèng pa'-teppa', sarta bhăghoes tèngka-lakona, dhăddhi Băng Sè'an băn binèna paḍă kentjeng nampanè. Abăng Sè'an tjè' pèrakka, marghă ana'na sè talèbăt èkanèserrè ghellǎ ' la bhăkal olèa djhoeḍhoe. Sèjang malem abă'na ta' amboe kèr-pèkkèran; bărămma akalla sè ngennènga anjata'aghi panganèserra, ijă arèja: sè ngennènga ngardjǎi palakèna ana'na. Molana aba'na apèkkèr sèjang malem tjara djărèja, marghǎ ta' anḍi' sè èkabhănḍhă'ă ghăbăjjă. Saopama abă'na njarèa tang-otangan, kabătèr, tako' ta' kellar njerra; ngangghoejă bhănḍhăna djhădjhoewăllă, tako' pas mamatè lalakonna, băn polè tako' ta' menḍăng, marghă la karè sakonè', polana bhoeroe èkabelli bengko băn pakaranganna ghellă'. Bit-abit abă'na pas ènga' ka adhăddhǎ orèng Bogor băn Bătawi, ijă arèja : djhăng-ondjhănganna orèng băḍă ghăbăjjă paḍă asasalaman pèssè, kongsè ollè lebbi ḍări bhănḍhana. Pèkkèran sè tjara djărèja ta' èkaènga'è landjhăng ghălloe, abă'na ladjhoe dhoeli èntar ka tatangghana sè abăk soghi, ngèndjhăm pèssè kalabăn nangghoengngaghi bengko băn pakaranganna. Orèng sè èèndjhămè aberri'.
Amarghă djărèja Băng Sè'an pas dhoeli asanat sè băḍă'ă ghăbăjjă. Lă-bhălăna è Bogor băn Bătawi paḍă èondjhăng kakabbhi, apa polè orèng è sakampongnga băn mo-sarmoanna è Soekaboemi taḍă' tjèttjèr sèttonga, kabbhi paḍă èondjhăng. Tattaroppa la saḍijă, kowaḍé băn rarengghăn laènna la marè èpasang. Saellana napa' ka arè dhăddhina, ijă arèja arè sè èangghep bhăghoes, mèn-rammènna pas èmolaè, sarta djhăng-ondjănganna la ḍăteng. Pangantanna èarak talèbăt rammèna, sarta apangèrèng tabbhoeăn băn mosik, taḍă' bhidhăna bi' ghăbăjjă orèng soghi.
Dhinèng pangantanna èpanompa' rata radjă sè ètarèk djărăn Pèrsi ḍăḍoewă', sarta apangangghoej emmas ènten talèbăt bhǎghoessa, tjahjăna kongsè tjara sè rebbhăng. Djărèja kabbhi paḍă ollè njèwă ḍări orèng soghi. Saellana pangantanna sè ngarak ghellă' molè, djhăng-ondjhănganna sè ngèrèngngaghi pas paăă todjoe'. Ka'-angka'na talèbăt bănnja'na, noro' kapprana atoranna orèng Bogor băn Bătawi.
Kamalemmanna djhăng-ondjhănganna ghellă' bănnja' ḍăteng polè ka bengkona Băng Sè'an, parlo nèngghoe bădjăng, mantja' băn tatèngghoen laenna . E malem djărèja talèbăt rammèna, sarta orèng sè ḍăteng abănnja'an ḍări sè sèjangnga, sabăb è băkto sèjangnga bănnja' sè nemmo aral. Mèn-rammèn ghellă' abiddhă kongsè ḍoewă arè ḍoewă malem.
E nalèka mè-rammèna ghăbăj, Băng Sè'an băn binèna arassa ta' wan-karoan pèkkèrra, marghă tèr-kettèren, tako' băḍă djhăng-ondjhănganna sè kakorangan ka'-angka' otabǎ ètjalè orèng, sè polana korang rammè otabă sabăb laènna. Băn polè
