- Ich weiss nicht was soll es bedeuten
- Dass ich so traurig bin!
- Ich weiss nicht was soll es bedeuten
Nang bumati si P. Florentino sa munting lipunan ay hindi na naghahari doon ang pagkakainisan dahil sa nakaraáng pagtatalo. Marahil ay nakaakit sa mga budhi ang masasayang bahay sa bayan ng Pasig, ang mğa kopa ng mğa alak na Jeréz na tinunggâ upang humandâ ó marahil ay ang pag-aantabáy sa isang mabuting pananghalian; magíng alín man sa mga tinuran ang sanhi, ang katunayan, ay nangagtatawanan at nangagbibiruán na, sampú ng pransiskanong payát, kahit na hindi nangagiingáy: ang kanilang mga tawa'y kahawig ng mga ngiwi ng isáng mamámatáy.
—Masasamang panahón!, ¡masasamang panahón!-ang sabing tumatawa ni P. Sibyla.
—¡Maano namang huwag kayóng magsalita ng ganyán, Vice-Rector!--ang sagot ng kanónigong si P. Irene, sabáy sa pagtutulak sa luklukan noon-sa Hongkong ay malusog ang inyong pangangalakal at nagpapatayo kayo ng mga bahay na bawa't isá ay.... ¡há!
—¡Tate, tate!-ang sagót hindi ninyó nákikita aming mga gugol, at ang mga naninirahan sa aming mga aring lupain ay nagsisimula na sa pagtutol....
—¡Siyá, siyá na ng kádadaíng, pagka't kung hindi ay iiyak na akó-ang masayang sigaw ni P. Camorra.-Kami'y hindi dumádaíng gayong wala kaming mga lupain ni mga banko. At alamin ninyó na nagsisimula na ng pagtawad sa mğa deretsos ang aking mga indio at iniuukilkil sa akin ang mga taripa! ¡Sukat bá namang ukilkilán akó ng taripa ngayón, at taripa pa namán ng Arzobispo na si D. Basilio Sancho, puñales, wari baging mula noon hangáng ngayon ay hindi námahal ang mga bagay-bagay. Ha, ha, ha,! Bakit mámumura pá ang isáng binyág kay sa isang inahing manók? Nguni't ako'y nagtataingang kawali, sinisingil ko hangáng saan makaabót at hindi akó dumadaíng kailán mán. Hindi kami makamkáin, anó, P. Salvi?
