This page has been validated.
Seksyon 1. (1) An serbisyo sibil kaipuhan administraron kan Komisyon sa Serbisyo Sibil na kompwesto nin sarong Tagapamayo asin dwang Komisyunado na kaipuhan tubong-aking syudadano kan Pilipinas asin, kan sinda nombraran, treinta'y singko anyos an edad, na igwang aprobadong kapasidad para sa administrasyon publiko, asin dai nagkandidato para sa anuman na elehidong pwesto antes kan saindang nombramyento.
- (2) An Tagapamayo asin mga Komisyunado kaipuhan nombraran kan Presidente sa pag-oyon kan Komisyon sa Nombramyento para sa terminong pitong taon na dai na giraray pwedeng nombraran. Sa mga enot na nanombraran, an Tagapamayo makapot kan pwesto sa laog nin pitong taon, an sarong Komisyunado sa laog nin limang taon, asin an saro pang Komisyunado sa laog nin tolong taon, na dai na giraray pwedeng nombraran. An pagnombrar sa anuman na bakante kaipuhan sana na para sa dai natapos na panahon nin serbisyo kan sasalidahan. Maski noarin dai dapat ba nombraran o idesignar an siisay man na Myembro sa temporaryo o nanunungod na kapasidad.
Sek. 2 (1) An Serbisyo Sibil sakop an gabos na mga sanga, parte, instrumentalidad asin ahensya kan Gobyerno, pati na an mga korporasyon na sadiri asin kontrolado kan gobyerno na igwa nin mga orihinal na karta.
- (2) An mga nombramyento sa serbisyo sibil kaipuhan gibuhon sana segun sa merito asin pagka-bagay na dedesisyunan kun pwede asin apwera sa mga pagdeterminar nin pagdesisyon sa palakaw, na kompidensyal o tunay na teknikal, sa paagi nin kompetetibong pag-iksamen.
- (3) Daing opisyal o emplyado sa serbisyo sibil an hahaleon o sususpendihon apwera sa kadahilanan na itinao kan ley.
- (4) Daing opisyal o emplyado sa serbisyo sibil an kaipuhan sumale, direktamente o indirektamente sa anuman na pangangampanya sa eleksyon o sa iba pang trabahong pampulitika.
- (5) An diretso sa pagmukna nin sadiring organisasyon dai kaipuhan haleon sa mga empleyado kan gobyerno.
- (6) An mga temporayong emplyado sa Gobyerno kaipuhan tawan nin proteksyon arog kan itinatao kan ley.
