443
pamurubuot ngan gin-angkon an ngatanan nga nahasusurat didto.
―Nasiring ka nga surat ngadto hin usa nga babayi? ―nagpakiana in usa nga pransiskano, ano man in paghikaptihan piskal?
Waray baton an tenyente; siniplatan hin dalikyat hi P. Salvi ngan pumaharayo hin tigda, gintabok an ruwang hin dagko nga biksal, hamtang naghihiruhimangraw an iba.
―Dinhi kinikita an kamot sa Dios! ―nagsiring in usa ―pati an kababayin'an nagdudumot ha iya.
―Pinasuritan an iya balay basi matalwas, kundi waray paghunahuna nga may ada ngayan nakakasagaki, (8) an iya babayi, sinmagbang in usa, nagtitinawa. ―Kamot sa Dios! Santiago ugop han Espanya!
Dida hini an tigurang nga militar inmukoy han iya paglinakatlakat ngan dumaop kan Maria Clara nga nagpipinamati han karukayakan, waray pagkikiwa didto han iya linilingkuran: ha iya mga tiil nagsasarang in mga bukad.
―Matagam ka nga daraga, ―ginsiring han tigurang hin hinay nga tingog; ―maupay an imo paghatag han sukay dida hini waray kabantaran an iyo pangukoy mga sano buwas.
An daraga waray pakayakan, kinmagat na la han iya im-im ngan ginkinita an militar nga nagtitiharayo. Salamat kay dinmaop hi Dada Isabal. Hi Maria Clara ginmahom pa pagkapyot dida ha iya panapton.
―Dada-nganiya.
―Inaano ka?-nagpakiana, nalisang han pakakita han dagway han iya umangkon.
―Tugwayi ako ngadto ha sulod! nangamaya ngan kinmapyot ha butkon han tigurang pagbuhat.
―Masakit ka, iday? Nanluluya ka, inaano ka?
―Nalilipong ako . . . iton mga tawo ha ruwang... masilaw kaupay . . . karuyag ko pumahuway. Sidnga hi tatay nga makaturog ako.
―Iginbabalhas ka hin mahagkot! Karuyag mo in siminti?
Hi Maria Clara pinmiling, sinmulod ha iya sulod ngan yawihan an purtahan ngan, tungod han kamaluya, pinmakapuklid ha salog, ha tungod hin usa nga ladawan, nagngunguyngoy.
―Iroy ko, iroy ko!
