425
mag-ugayon nga ngaran. Hi Ibarra la an waray; bisan hi Nor Juan ngan han magturutdo ha liburan nagkawawara.
—Ano in binuhat ha imo han akon bana ngan han akon anak?— ginyaknan ni Doray; —kitaa inin akon anak! Ginkuhaan mo hin amay!
An mga kabiduan han mga urupod naginkasina kontra han batan’on nga gintatahapan nga asya in nangulo han kagubot. An alperes nagsugo pagkalakat.
—Matalaw ka!— ginuliatan han ugangan ni Andong.
—Hamtang nangangaway an iba tungod ha imo, nakadto ka natago, matalaw!
—Tampalasan ka!— an pulong hin usa nga tigurang nga nagkikinita ha iya; —tampalasan an salapi nga gintinirok han imo mga kag-anak kay pagsamok la han amon kamurayawan! Tampalasan, tampalasan!
—Angay ka bitayon, irihis! — ginuliatan hin usa nga urupod ni Albino nga babayi, ngan waray pakailob, pinmurot hin bato ngan linabay.
An susgaranan sinubad dayon ngan an batan'on inuranan hin baras ngan hin bato.
Inilob ni Ibarra hin waray kasina, waray araba, an tuang nga panimulos han kadam’an nga samdon ha kasingkasing. Amo adto an pagikan ha iya han bungto nga hinmumutangan han ngatanan niya nga hinigugma. Itinungok an ulo; tingali nahanumdom hin usa katawo nga iginlibod ha Manila, usa nga tigurang nga babayi nga namatay ha tungod han pinugot nga ulo han iya anak; tingali an kaagi ni Elias nalabay ha iya mga mata.
An alperes nakahunahuna nga kinahanglan paantawon an kadam’an nga magtarambong, kundi an mga bato ug mga buyayaw waray hunong. Uusa la nga iroy an waray bubulig panimulos han iya kasakit: hi Kapitana Maria. Waray pagbabantad, inipit an mga im-im, an mga mata puno hin magmingawon nga luha, nagkikinita han duduha nga anak nga nagtitiharayo; kun pagkit’on ta an diri niya pagbantad ug an iya mahilom nga kasakit, pakakasidngon ta nga hi Niobe(1) diri ngayan susumaton la.
Nahiantaw an magkaralakat.
Dida han mga tawo nga nananangbo dida han pipira nga binuksan nga tarangbuan, an nagpakita la hin kaluoy han batan’on amo lugod an mga waray iabot, magkirita la. An
