—Dad’a ngadto hiton mga patay!— an sugo niya.
Ha usa nga piliw han sakob han alad ha luyo han tri bunal, tinatambak ha usa nga karreton nga daan nakadto, in lilima nga minatay, an tuman la nga natatabunan hin gusi nga Iona nga malamiri. May uusa nga sundalo nga nagsisinuduysudoy pagbantay, naglilinura.
—Pinangingilala mo?— nagpakiana an alperes, pinali an Iona.
Hi Tarcelo waray baton; hinkit’an niya an lawas han bana han tuyaw ngan hin duha pa, pati an kanan iya bugto nga gintuhuktuhok hin bayoneta ngan han kan Lucas la was nga may higot pa ha liog. Nagmabiduon an iya paniplat ngan in usa nga panhayhay ginmawas ha iya dughan.
—Nangingilala ka? — ginpakianhan liwat. Hi Tarsilo pinmakangula.
May nagpanlapirit ngan an uway tinmugpa ha iya bungkog, kinmurog hiya, nanguros an iya mga unod. Nagsunudsunod an lapdos, kundi hi Tarsilo waray kaalantad.
—Lambahon tubtob ngada han paglasawi hin dugo, kun diri magyakan!— ginmuliat an alperes, nauurit na.
—Pagyakan na la!— sinmiring an direktorsilyo;— papatayon ka manta.
Gindara liwat ngadto han ruwang nga hinmumutangan han iya kaupod nga nagpipinangamuyo han ngatanan nga santos, ikinukurog ngan nakibang an mga tuhod.
—Nakilala ka hini?— nagpakiana Hi P. Salvi.
—Pakakakita ko pa la ha iya!— binmaton hi Tarsilo baga may dara nga pagkaluoy an iya paniplat ngadto han usa.
Sinuntok hi Tarsilo ngan binanyakan han alperes.
—Iguos ha bangko!
Igin-guos ha usa nga bangko nga kahoy, waray ngani kuhai han gapos ha kamot nga nagkakadugo. An waray palad naniplat paluyuluyo daw may pinamimiling, ngan say hisiplatan hi Da. Consolacion; nahakatawa. Nanhipausa an namamagtambong, ginsunod an iya paniplat ngan ira hinkit’an an ginang nga nananakmol.
—Waray pa ako pakakita hin sugad kamaraksot nga babayi!— nagyakan hi Tarsilo, sinmahi han pagmingaw han ngatanan; — gabay ako kumulob ha usa nga bangko, sugad hinin akon binubuhat yana, diri la ako igkadirig ha iya, sugad hiton alperes.
