Ngan lumakat.
Hinsasakban ko unta kagab-i — nagsiring hamtang naglalaknit han halapad nga birma ngan natadong pagtindog, pagpakilala na han kinaiya nga bayhon ngan dagway ni Elias.
Mi gozo en un pozo (2)
An mga sibil namamagsuduysudoy, magpakaharadlok an dagway, ha tungod han purtahan han tribunal nanhuhuyo pagkulata han mga magpasiparahon nga kabataan nga nangingikid, o nagpapausung-usong, magpakakita la ngadto ha luyo han mga rihas.
An ruwang diri na kanan malipayon pagkit'on sugad hadto han pagtitiruki paghiruhimangraw mahatungod han kaadlawan han patron; yana masirom ngan makaharadlok. An mga sibil ug mga kuwadrilyeros nga nakadto an tuman la nga naghihiruhimangraw, an tuman nga nanluluwas tinag-usa kapulong. Dida han lamisa namamagsinurat an direktorsilyo, duduha nga eskribyente ngan hin may pipira nga sundalo; an alperes naglilinakatlakat, magpaniplaton na man hin mabangis nga siplat ngadto ha may hagdanan; hadto nga uras diri linalabwan hin kadako hin buot ni Temistocles han nakadto han Juegos Olimpicos katima han away ha Salamina. Hi Da. Consolacion iginpapanhuyam didto ha piliw, ha ikinapagtuab han baba hinkikit'an in maitom nga nasarag nga kulang hin ngipon; an iya paniplat, nga nanunulot, ngadto itatadong ha bilangguan nga puno hin maghugaw nga mga dagway. Tinutugutan hiya han iya bana, nga malipayon yana tungod han pagdaog ha away, nga makagkita hiya han pagsusi han mga dinakop ngan, layon na man la, an pagkita han mga kastigo nga ighahatag. An hiena nabaho han mga patay, naglalaway na ngan nauuyam han kamaiha han panhatag han mga pahamaan.
An gobernadorsilyo nagugupong: an iya lingkuran, an lingkuran nga dako ha tungod han retrato ni S.M., waray nalingkod ngan baga ginhuhunahunaan hin pagpalingkuri hin iba nga tawo.
Ha mga harani hin ikasiyam an takna umabot an padi, nagkukuriot.
