linmibot han balay, limayat hin usa nga kuta, nagsaka hin usa nga bintana ngan sinmulod ngadto han gabinete nga nalalawagan pa han kandila nga hinngalimtan ni Ibarra.
Hinkit'an ni Elias an kapapilan ug an mga basahan; hin-agian niya an mga hinganiban, an mga sako nga may sulod nga salapi ug mga alahas. Iya ginpanuhatuha ha iya hunahuna an nahinabo didto ngan han pakakita niya han damo nga papel nga makakaamong, nakaisip hiya pagkuha, paglabog ha tangbuanan, paglubong hadto ngatanan.
Sinmiplat hiya ngadto ha tanaman ngan, dara han pawa han bulan, nakakita hiya hin duha nga sibil nga may upod nga uusa nga tumarabag: an mga bayoneta ug mga kapasete namamaggimlat.
Nakapamurubuot hiya han angay buhaton: nagtambak hin mga dugnit ug mga papel ha butnga han gabinete, hinuwaran niya hin petrolyo ngan suritan. Itinaklos niya dayon an mga armas. Hinadkan an retrato ni Maria Clara, ngan isulod niya didto ha usa han mga sako ngan dad'on niya adto ngatanan ngan umambak ha tangbuanan...
Igo na gud man; hadto ngahaw gin-guguba man han mga sibil an purtahan.
—Paagia kami kay kukuhaon namon an mga papel han iyo agaron nasiring an direktorsilyo.
—Nagsarit na kamo? Kun waray, diri kamo makakasaka nagbaton in usa nga lagas.
Kundi nalugos hira pangiwas kay ginkulata hira han mga sundalo ngan ini namagkasaka... kundi sinugat hira dayon hin madakmol nga aso ngan hin laga hin kalayo nga nakakapuno na han balay ngan nan-guguwa na ha mga tangbuanan.
—Sunog! sunog! kalayo! — naggugliat an ngatanan.
Ngatanan dinmaop pagtalwas han mahihimo pa, kundi an kalayo napaabot na ngadto han gutiay nga laboratoryo ngan didto namagbuto an mga maglaga nga mga tambal.
An mga sibil namag-isol; nakapugong ha ira an kalayo nga naghahagurong ug natubod han ngatanan nga igkita. Kawang la an pagsinarok hin tubig ha timba; ngatanan naguliat, nakikitabag, kundi waray ha ira may dinmaop. An kalayo nagdalait ngadto han iba nga sulod ngan nagtipaigbaw, nag-aasusong. An bug-os nga balay nagdudukot na, ngan an hangin, han kadangdang, binmulig paghuyop; tikang ha hirayo nagdaop in mga parauma, kundi nagdaop
