magbug-at ipitad; dugo nga nagbabalod, mga magranggat ngan kasisidman nagsusunudsunod ha iya pangitaan.
Bisan masanag kaupay an bulan, an batan'on nagpapamudol dida han mga bato ug mga kahoy dida han mamingaw ug waray maglalakat nga mga dalan.
Ha harani han kuwartel nakakita hiya hin mga sundalo nga pusilan, mga pinanal-uban hin bayoneta, namamaghiruhimangraw hin makusog, salit waray panabot han iya paglabay.
Ha tribunal nababati in linagatob, gugliat, mga haroy, mga pangisog; an tingog han alperes asya an nalabaw han kanan iba.
—Ha pandugan! gapuson iton mga kamot! Pabuthan makaduha an magkiwa! Sarahinto, ikaw an magbantay! Yana nga gab-i waray lumakat, bisan an Dios! Kapitan ayaw katurog!
Hi barra dinmagmit ngadto ha iya balay; ginhihinulat hiya han iya mga suruguon nga nagkakababaraka na.
—Siyahi niyo an maupay nga kabayo ngan unina pangaturog kamo na la! - iya ginsiring,
Sinmulod ngadto ha iya gabinete ngan mag-andam hin dalidali hin usa nga maleta. Inukban niya in usa nga pirit'an nga puthaw, iya kinuha ngatanan an iya didto salapi ngan igsulod ha sako. Gintirok niya an iya mga alahas, pinalos in usa nga retrato ni Maria Clara ngan pumurot hin usa nga daga ngan hin duha nga rebolber, masingadto hin usa nga armaryo nga amo an hinmumutangan han iya mga garamiton.
Hadto ngahaw nabati in tulo nga tigda nga tuktok ha purtahan.
—Hino? — nagpakiana hi Ibarra hin tingog nga makaharadlok.
—Ha ngaran han Hadi, buksi dayon, kun diri gugub'on namon inin sada! — binmaton hin kinatsila in tingog nga mapiriton.
Hi Ibarra sinmiplat ngadto ha tangbuanan; nag-inggat an iya mga mata ngan iya kinasahan an rebolber; kundi nagbalhin hin panhunahuna, ibinutang an armas ngan hiya ngahaw an umukab han purtahan, igo nga nagdadaop na an mga suruguon.
Kinaptan hiya dagos hin tulo nga pusilan.
