—Jesus, Mariay Jose! sinmiring an dada nga na- ngudos, pagpahirayo hin maraot nga hunahuna; hino in makakasupat hini nga kabataan?
———oOo———
Ha sirong han kakahuyan nga an tuman la nga nalalawagan han madalumdom nga sanag nga iginpapasarang han bulan dida han magrabong nga mga sanga naglilinakat hin hinay nga pagpamitad in usa katawo. Usahay, dapit ada pagbiling hin dalan, danay tumaghoy hin usa nga baga lain nga tunog ngan dayon babatuna didto ha hirayo hin sugad nga kataghoy. Ini iya pinamamatian ngan katitima magpadayon liwat han lakat tipakadto han tinitikangan han harayo nga taghoy.
Katapos hin damo nga makuri nga gin-agian, kay amo na gihapon kun gab-i an iginlalakat ha kasusudpan, inabot niya in usa nga gutiay nga hawan nga binabanaagan han bulan nga kaudto hin subang. Ginlilibot adto hin hagtaas nga bato nga pinanudkan hin kahoy ha pungkay ngan daw nagigin-angbuanan tipakadto ha hawan; mga kahoy nga kapupulod pa la, mga kinaingin nga tuod, nagkakata ha butnga, sakot hin dagko nga bato nga waray ngatanan katatabuni han banwa nga nanunubo ha bawbaw.
Igo la nga naabot ngadto an tawo umulpot dayon in usa liwat tikang ha luyo hin usa nga bato ug nagtidaop ngan hinmukad hin rebolber.
—Hino ka? —nagpakiana hin tinag-alog, hin mapiriton nga tingog, dungan an paglagatik han gato han iya armas.
—Tampo niyo an tigurang nga Pablo? nagpakiana an una umabot, hin mahinay nga pulong, waray bumaton han pakiana ha iya ngan waray patarhog.
—An kapitan, karuyag mo sidngon? Oo, hahani.
—Sidnga nga may tuyo ha iya hi Elias, nagsiring an tawo nga diri iba kun diri an paurusahon nga piloto.
—Amo ka hi Elias? —nagpakiana an usa, may dara nga pagkatahod, ngan nagtiharani, kundi tinatagaan niya gihapon han iya rebolber; —kun sugad... tana.
Binmunyog hi Elias.
Sinmulod hira hin usa nga dapit lungib nga nalupot
