— Lurong!— ngani Sinang na man, —diri kay ngatanan nga mahal sumukot makinaadmananon. Kitaa daw kan Dr. Guevara; diri pa igo nga waray pakatabag han paganak, kay gin-utod la an bata, inmaro pa hin kalim'an kapisos han nabalo . . . waray hinbabaruan nga iba kun diri pagsukot.
— Kay sayod ka? —pinakianhan hiya han iya patod, ngan siniko.
— Ano in diri ko kasayod? An bana, nga paralagadi. kamatyi la han asawa, bawian pa han iya balay kay an Alkalde, nga sangkay han mananambal, say nagpirit ha iya pagpabayad ano in diri ko kasayod? Hi tatay amo in pinmautang hin kuwarta nga binalon ngadto ha Santa Cruz.
Usa nga kotse nga inmukoy ha tungod han balay asya in nakautod hadto nga hiruhimangraw.
Hi Kapitan Tiyago ngan hi Dada Isabel, magbunyog, nagdadlagan ngadto pagsugat han namagkaabot. Diri hira iba kundi an doktor D. Tiburcio de Espadana ngan han iya asawa, doktora Da. Victorina de los Reyes de de Espadana ngan hin usa nga batan'on nga katsila nga makiaangayon an pamayhon ug angayan an tindog.
An babayi, may sulot nga bata nga seda nga binurdahan hin mga bukad, ngan hin usa nga kalo nga may dako nga papagayo nga daw nadudugmok ha butnga hin magtagom ug magpula nga sintas; an taputapo ngan han bukbok ha bugas nga nagkakasalakot dida han iya bayhon baga nakakadugang han panguros han iya kahimo; sugad han paghikit'i ta ha iya didto ha Manila, yana nakikigkab-it man ha butkon han iya bana nga piol.
— Iginpapakilala ko ha imo inin amon patod, hi D. Alfonso Linares de Espadana.
An batan'on nakigkatahod hin angayan nga kiwa; hi Kapitan Tiyago haros humarok han kamot.
Hamtang naghahakot ha igbaw han kadam'an nga maleta ug mga surudlan hin dugnit ha paglakat, hamtang gindadara hira ni Kapitan Tiyago ngadto han ira sulod, hinabihi ta ini nga magtiayon nga an tuman ta la nga hinkilal'an didto han siyahan nga bahin.
Hi Da. Victorina asya in usa nga ginang nga may kakap'atan na kaglima kaagosto an panuigon nga sama hin kakatluan la kagduha kaabril, sugad han iya mga ihapihap. Ha iya pa pagkabatan'on na may maupay niya nga
